З кіраўніцтва «Раскосмасу» звольнілі апошняга касманаўта

Сяргей Крыкалёў быў звольнены за крытыку кіраўніцтва.

Дзяржкарпарацыя Раскосмас - манапольны аператар расейскіх касмічных праграм з адкрытым гадавым бюджэтам на 180 млрд рублёў - пазбавілася апошняга касманаўта ў вышэйшым кіраўніцтве.

Герой Расеі і Савецкага Саюза Сяргей Крыкалёў, які здзейсніў 6 касмічных палётаў і 8 выхадаў у адкрыты космас, быў зняты з пасады выканаўчага дырэктара пілатаваных праграм «Раскосмасу», паведаміў «Інтэрфакс» са спасылкай на прэс-службу дзяржкарпарацыі.

Крыкалёва, які кіраваў напрамкам пілатаванай касманаўтыкі з 2016 года, перавялі на пасаду дарадцы Дзмітрыя Рагозіна, а ягоныя функцыі перадалі выканаўчаму дырэктару пілатаваных праграм і навукі Аляксандру Блашэнку, у мінулым чыноўніку Мінпрамгандлю і Мінабароны.

Хоць «Раскосмас» звязаў звальненне Крыкалёва з падрыхтоўкай праекта новай расейскай касмічнай станцыі, рэальнай прычынай стала крытыка, якую касманаўт выказаў у сувязі з планамі здымаць на МКС камерцыйны фільм «Выклік», распавялі крыніцы «Новай газеты» ў дзяржкарпарацыі.

Сам Крыкалёў пацвердзіў «Адкрытым медыя», што «гэта праўда» і адмовіўся ад далейшых каментароў.

Крыкалёў выступіў з рэзкім нязгодай з нагоды выдачы сродкаў «Раскосмасу» на здымкі фільма з Юліяй Перэсільд і Клімам Шыпенкам (рэжысёр і аператар у адной асобе), якія, як чакаецца пачнуцца ў кастрычніку.

Хоць у «Раскосмасе» падкрэсліваюць, што не звальнялі Крыкалёва, а перавялі на іншую пасаду, адказнасць і паўнамоцтвы яго старой і новай пазіцыі «параўноўваюць як пасаду начальніка цэха і вахцёра на прахадной», піша «Новая».

«Такія кадравыя пастановы пераконваюць, што касманаўтыка ў Расеі не патрэбная», - абураны калега Крыкалёва, касманаўт Юрый Юрчыхін.

«У нас сёння ў галіне велізарная колькасць непрафесіяналаў, якія дакладна ведаюць, што рабіць з галіной», а «самае важнае з усіх кірункаў у касманаўтыцы - гэта кіно», з горыччу іранізуе ён.

«Здымкі фільма на МКС збіраюцца весці ў рамках так званага навуковага эксперыменту «Выклік». Пад гэтым бюракратычным прыкрыццём была зламаная праграма касмічных палётаў 2021 года. Праграма навуковых экспэрыментаў фармуецца не раптам, даволі доўга. Паводле старой праграмы на борце было тры чалавекі. Праз гэты эксперымент мы выкінулі траціну працоўнага часу - цяпер на борце плануецца два чалавекі на працягу года», - тлумачыць Юрчыхін.