CNN: ЗША атрымалі паведамленне пра выцек на кітайскай АЭС

Папярэджанне паступіла ад кампаніі, якая дапамагае эксплуатаваць АЭС "Тайшань".

Урад ЗША на мінулым тыдні атрымаў і правярае паведамленне аб радыелагічнай пагрозе на кітайскай атамнай электрастанцыі "Тайшань", паведамляе тэлеканал CNN са спасылкай на крыніцы, піша РІА "Новости".

Паводле звестак ТБ, папярэджанне аб немінучай радыелагічнай пагрозе паступіла ад французскай кампаніі Framatome, якая часткова валодае і дапамагае эксплуатаваць АЭС Тайшань у правінцыі Гуандун.

"Сітуацыя ўяўляе сабой немінучую радыелагічную пагрозу для аб'екта і насельніцтва, і Framatome тэрмінова запытвае дазвол на перадачу тэхнічных звестак і дапамогі, якая можа спатрэбіцца для вяртання станцыі да нармальнай працы", - гаворыцца ў лісце кампаніі, накіраваным у міністэрства энэргетыкі ЗША, які патрапіў у распараджэнне CNN.

Як паведамляе тэлеканал, у лісце Framatome заявіла, што кітайскі рэгулятар павысіў дапушчальныя межы выяўлення радыяцыі за межамі АЭС, каб пазбегнуць закрыцця аб'екта.

Дасведчаная крыніца заявіла CNN, што на гэты момант афіцыйныя асобы ЗША не думаюць, што выцек знаходзіцца на "крызісным узроўні", але прызнаюць, што сітуацыя патрабуе назірання.

Крыніцы паведамляюць, што ў сувязі з паведамленнямі рада нацыянальнай бяспекі ЗША правяла некалькі пасяджэнняў на мінулым тыдні. Адміністрацыя ЗША абмеркавала сітуацыю з французскім урадам і экспэртамі ў міністэрстве энэргетыкі, паведамляе ТБ. Са слоў крыніц, ЗША падтрымлівалі кантакты з урадам Кітая, хоць іх маштабы невядомыя.

Паводле звестак тэлеканала, Framatome звярнулася да ЗША для таго, каб атрымаць дазвол на выкарыстанне амерыканскай тэхнічнай дапамогі для развязання праблемы на кітайскай станцыі.

У сваю чаргу, энэргагенерыруючая кампанія Францыі і кампанія-аператар атамных электрастанцый Électricité de France (EDF) паведаміла, што паінфармаваная аб павелічэнні канцэнтрацыі рэдкіх газаў на кітайскай атамнай электрастанцыі "Тайшань".

"EDF была паінфармаваная аб павышэнні канцэнтрацыі пэўных рэдкіх газаў у першым контуры рэактара №1 на Тайшаньскай атамнай электрастанцыі", - гаворыцца ў камюніке кампаніі, апублікаваным у панядзелак.

Адзначаецца, што наяўнасць такіх газаў у першым контуры рэактара - гэта вядомая з'ява, прадугледжаная эксплуатацыйнымі працэдурамі рэактараў.

Пры гэтым паведамляецца, што французская кампанія запатрабавала склікаць пазачарговую раду дырэктараў TNPJVC, уладальніка і аператара гэтага супольнага прадпрыемства для прыняцця неабходных пастаноў.