Рада ЕЗ скасавала абмежаванні на паездкі для ўладальнікаў «пашпартоў вакцынацыі»

Сістэма распрацаваная таксама для выкарыстання ў краінах, якія не з'яўляюцца чальцамі Шэнгенскай зоны.

Рада ЕЗ зацвердзіла пастанову аб скасаванні абмежаванняў на падарожжа ў рамках блока для ўладальнікаў лічбавых сертыфікатаў COVID-19.

Пра гэта паведамляе «Еўрапейская праўда» са спасылкай на пастанову Рады ЕЗ.

«Уладальнікі сертыфікатаў аб вакцынацыі, выдадзеных у адпаведнасці з рэгламентам ЕЗ па лічбавых COVID-сертыфікатах, не павінны праходзіць тэставанне або карантын/самаізаляцыю, калі яны цалкам прышчэпленыя вакцынай, ухваленай Еўрапейскім агенцтвам лекавых сродкаў, і прайшло не менш за 14 дзён з моманту поўнай вакцынацыі. Дзяржавы-чальцы таксама могуць зняць такія абмежаванні пасля першай дозы ў выпадку дзвюхдозавых вакцын», - гаворыцца ў паведамленні.

Таксама скасаваныя абмежаванні для асоб, што маюць сертыфікат, які сведчыць пра тое, што прайшло менш за 180 дзён з даты станоўчага выніку тэставання.

Абмежаванні для іншых вандроўцаў павінны грунтавацца на тым, наколькі краіна, з якой яны прыязджаюць, узяла пад кантроль распаўсюджванне COVID-19.

ЕЗ уводзіць сертыфікаты COVID-19, якія будуць указваць, ці прышчэплены чалавек, ці мае імунітэт, бо раней быў інфікаваны, або нядаўна прайшоў адмоўны тэст. Сістэма павінна быць гатовая да 1 ліпеня, хоць некаторыя краіны ўжо запусцілі сертыфікаты раней.

Дзяржавы-чальцы таксама змогуць націснуць на «экстраны тормаз» і забараніць усе паездкі з рэгіёну, што ёсць усплёск захворвання.

Сістэма распрацаваная таксама для ўжывання ў краінах, якія не з'яўляюцца чальцамі Шэнгенскай зоны - Ісландыі, Ліхтэнштэйна, Нарвегіі і Швайцарыі, але не для Вялікай Брытаніі.

Наведвальнікі з іншых краін таксама могуць прыехаць, калі яны могуць давесці, што яны прышчэпленыя. Аднак памежная палітыка агулам з'яўляецца пытаннем асобных краін ЕЗ, таму яны могуць устанаўліваць уласныя правілы.