Як беларуска атрымоўвала сертыфікат аб вакцынацыі супраць COVID-19 і колькі за яго заплаціла

Аляксандра Разіна распавяла, якія дакументы ў яе патрабавалі.

У пачатку траўня карэспандэнтка intex-press.by Аляксандра Разіна зрабіла ў Баранавічах другую прышчэпку ад каранавіруса, але атрымаць запаветны сертыфікат ёй удалося толькі праз месяц. Якія дакументы запатрабавалі, як выглядае дакумент аб праходжанні вакцынацыі і колькі ён каштуе? Адказы на пытанні ў матэрыяле:

Дзве прышчэпкі і...нічога

Сваю першую прышчэпку ад каранавіруса я зрабіла 14 красавіка. А праз два тыдні даведалася, што тым, хто прышчапіўся ад Кавіда, можна будзе атрымаць сертыфікат, які пацвярджае прышчэпку. Да таго ж ён будзе з'яўляцца адной з умоў бесперашкоднага выезду за мяжу (прынамсі, такія размовы ідуць).

Другую прышчэпку я зрабіла 4 траўня. Некалькі дзён пасля гэтага я спрабавала атрымаць свой сертыфікат, але запаветны дакумент мне так і не выдалі. Усё, што мне тады ўдалося даведацца ў інстанцыях, у якія я звярталася, што пытанне з сертыфікатамі развязваецца на ўзроўні рэспублікі. Прасцей кажучы, іх проста не было.

Доўгачаканы сертыфікат

У другой палове траўня стала вядома, што сертыфікаты нарэшце пачалі выдаваць. Па свой дакумент я адправілася 10 чэрвеня (каб напэўна) у Баранавіцкую гарадскую паліклініку №3 (туды, дзе рабіла прышчэпку).

З дакументаў спатрэбіліся толькі пашпарт і выпіска з медыцынскіх дакументаў (яе выдалі пасля другой прышчэпкі).

У рэгістратуры мяне адразу ж накіравалі ў касу, каб аплаціць сертыфікат. Яго кошт - пяць рублёў. Дарэчы, унесці аплату можна было толькі гатоўкай.

З чэкам я накіравалася ў кабінет даўрачэбнай дапамогі. Спецыялістка ўнесла ў сертыфікат мае пашпартныя звесткі, інфармацыю аб вакцыне і паказала тэрміны прышчэпкі.

Мой сертыфікат быў пад нумарам 93, з чаго можна зрабіць выснову, што больш за 90 чалавек ужо забралі свае сертыфікаты ў гэтай паліклініцы на 10 чэрвеня. Калі шчыра, я думала, што іх значна менш.