Генадзь Фядыніч: Улады Беларусі ў паніцы

Еўропа больш не верыць словам рэжыму.

Прынятае папярэдняе рашэнне, што новыя санкцыі з чацвёртага пакета Еўразвязу закрануць 78 чыноўнікаў рэжыму Лукашэнкі і 7 арганізацый.

Як заявіў у эфіры «Радыё Рацыя» адзін з лідараў Прафзвязу РЭП Генадзь Фядыніч, складана прадказаць, наколькі моцнымі будуць санкцыі, але відавочна, што еўрапейскія краіны цяпер настроены рашуча і кансалідаваныя, а ўлады Беларусі панікуюць:

- Такога падыходу да праблем, звязаных з Беларуссю, у найноўшай гісторыі яшчэ не было. Еўрапейцы - дэмакраты, яны хочуць сумленных, празрыстых прэзідэнцкіх выбараў у Беларусі. І хай народ сам вызначае свой лёс. Еўропа больш не верыць словам. У справах, у дзеяннях улады павінна быць канкрэтыка.

- Ствараецца ўражанне, што ўлады спачатку не верылі, што Захад так сур'ёзна паставіцца да санкцый. І зараз бачна, што яны напалоханыя, мітусяцца, зноў спрабуюць разыграць карту абмену палітвязнямі для змякчэння санкцый.

- Я скажу, што час прайшоў, і я думаю, што палітвязні так ці інакш будуць вызваленыя. Але яны больш не будуць разменнай манетай для санкцый. Цяпер з бюджэтам, на мой погляд, ужо праблемы. І, вядома, у першую чаргу гэта закране людзей, якія працуюць у дзяржсектары.