Амаль € 2 мільёны: Літоўскія мытнікі затрымалі новую партыю кантрабандных цыгарэт з Беларусі
10- 16.07.2021, 12:28
- 8,648
Падчас прастуквання грузу ў літоўцаў выклікаў падазрэнне глухі гук, характэрны для запоўненых паражнін.
У панядзелак літоўскія мытнікі і памежнікі затрымалі на мяжы з Беларуссю партыю кантрабандных цыгарэт амаль на 2 млн еўра. Як паведаміла delfi.lt Крымінальная служба мытні, кантрабанда была выяўлена ў грузавіку Scania, за стырном якога знаходзіўся грамадзянін Беларусі. Кіроўца дэклараваў, што вязе транзітам праз Літву ў Польшчу 20,5 тон драўніны.
Пры прастукванні грузу ў службовых асоб выклікаў падазрэнне глухі гук, характэрны для запоўненых паражнін. Пры дэталёвай праверцы выявіліся схованкі, поўныя цыгарэт Minsk Capital MS.
Паводле папярэдніх звестак (праверка схованак і падлік цыгарэт яшчэ не скончаны), агулам у грузавіку маглі правозіць амаль 560 тысяч пачкаў цыгарэт, кошт якіх з абавязковымі да выплаты падаткамі складаў 1,94 млн еўра.
Кіроўцу грузавіка затрымалі на два дні, пазней яго адпусцілі, былі прызначаныя меры стрымання - канфіскацыя дакументаў, падпіска аб нявыездзе і грашовы заклад.