ААН прыняла сваю першую рэзалюцыю аб зроку

Яна была прынятая кансэнсусам.

Генеральная Асамблея ААН 23 ліпеня ўхваліла сваю першую ў гісторыі рэзалюцыю аб зроку, у якой заклікала 193 дзяржавы-чальцы забяспечыць доступ да афтальмалагічнай дапамогі для ўсіх сваіх грамадзян. Пра гэта паведаміла AP.

Рэзалюцыя «Зрок для ўсіх», аўтарамі якой выступілі Бангладэш, Антыгуа і Ірландыя і суаўтарамі якой сталі больш за 100 краін, была прынятая кансэнсусам.

Дакумент падахвочвае краіны ўкараняць «агульнадзяржаўны падыход да афтальмалагічнай дапамогі». Таксама ён заклікае міжнародныя фінансавыя ўстановы і донараў надаць мэтавае фінансаванне, асабліва для развіваных краін, каб задаволіць рост ўплыў страты зроку на эканамічнае і сацыяльнае развіццё.

Як вынікае з рэзалюцыі, прынамсі, 2 млрд чалавек жывуць з парушэннямі зроку ці слепатой, а 1,1 млрд чалавек маюць парушэнні зроку, якія можна было б прадухіліць ці якія яшчэ можна выправіць.

На прагнозы аўтараў дакумента, глабальныя патрэбнасці ў афтальмалагічнай дапамозе істотна ўзрастуць і да 2050 года чакаецца, што палова насельніцтва свету будзе жыць з парушэннямі зроку.

Пасол Бангладэш у ААН Рабаб Фаціма падчас прэзентацыі рэзалюцыі сказала, што больш за 90% з 1,1 млрд людзей з парушэннем зроку жывуць у краінах з нізкім і сярэднім узроўнем даходу. Таксама, паводле яе слоў, 55% сляпых - жанчыны і дзяўчынкі. Агулам страта зроку абыходзіцца сусветнай эканоміцы ў суму $411 млрд, дадала Фаціма.

У рэзалюцыі падкрэсліваецца, што доступ да афтальмалагічнай дапамогі мае важнае значэнне для дасягнення мэтаў ААН на 2030 год па выкараненні беднасці і голаду, забеспячэнню здаровага ладу жыцця і якаснай адукацыі, а таксама скарачэнню няроўнасці.