IT-спецыяліст пра ўзлом базы ДАІ кіберпартызанамі: Апраўданні МУС выглядаюць не вельмі праўдападобна

Зламаць можна ўсё што заўгодна.

Кіберпартызаны заявілі, што паломка інфармацыйных сэрвісаў МУС у лініі ДАІ ў першай палове ліпеня адбылася не «праз анамальную спёку», як паведамлялі раней ва ўстанове, а гэта нібыта не што іншае, як узлом і атрыманне імі ўсёй інфармацыі з базы, паведамляе zerkalo.io.

Што кажуць кіберпартызаны

Напярэдадні, вечарам 26 ліпеня, пра сваё дачыненне да збояў у працы сэрвісаў МУС у лініі ДАІ заявіў тэлеграм-канал «Кібер-Партызаны Беларусі». Сцвярджалася, што яны «выпампавалі інфармацыю з базаў ДАІ МУС Беларусі»: ім нібыта вядомыя звесткі ўсіх уладальнікаў транспартных сродкаў, у іх ёсць фатаграфіі правоў, звесткі пра штрафы, парушэнні ПДР, спецтэхніку і многае іншае.

Карэспандэнт папрасіў кіберпартызанаў паказаць доказы, што была ўзламаная інфармацыйная база МУС. У адказ на гэта яны скінулі інфармацыю пра ўвесь транспарт, які быў у журналіста раней, а таксама зарэгістраваны цяпер. Кіберпартызаны таксама далі фатаграфіі ранейшых правоў кіроўцы карэспандэнта, электронны подпіс. Усё супала.

– Цяпер у нас будзе цэлая серыя пастоў на гэтую тэму, – расказаў журналісту адзін з удзельнікаў канала. – Усе атрыманыя звесткі будуць выкарыстоўвацца толькі для дэанону і збору іншай інфармацыі пра памагатых рэжыму, звычайным людзям не варта баяцца. Звесткі ў нас абароненыя лепш, і пасля перамогі ўсё выдалім.

ІТ-спецыяліст – пра магчымасць узлому падобных базаў

Журналісты таксама пацікавіліся ў дасведчанага ІТ-спецыяліста, ці можа база звестак выйсці з ладу «ад анамальнай спёкі» і ці магчыма атрымаць доступ да архіваў такіх засакрэчаных установаў, як МУС Беларусі.

– Як правіла, базы звестак захоўваюцца на сэрверах, якія размешчаныя ў дата-цэнтрах, яны заўсёды забяспечаныя кандыцыянерамі – гэта абавязковая ўмова, без гэтага нічога працаваць не будзе, таму што сэрверы вылучаюць шмат цяпла. Так што, мяркую, што спасылка на спёку ў гэтым выпадку выглядае не вельмі праўдападобна. Ну хіба што сэрвер МУС стаіць у кабінеце кіраўніка, – кажа эксперт.

З нагоды доступу да базы іншых людзей суразмоўца адзначае, што «зламаць можна ўсё што заўгодна, патрэбныя толькі нармальная галава і жаданне».

– Усе сістэмы праектуе чалавек і ўсюды могуць быць «дзіркі», якія трэба знайсці. А калі іх адшукалі, то зліць інфармацыю нядоўга. Звычайна гэта робяць хутка, таму што выцечку можна выявіць. Геніем для такіх справаў быць не трэба, галоўнае, каб чалавек добра разбіраўся ў «вантробах» аперацыйных сістэмаў і сетак. Ну, і звычайна гэта робіцца яшчэ з дапамогай «траянчыкаў», вірусаў.