«SMS каштавала $300»: Як пенсіянерка ўзяла ў Гародні крэдыт у банку і завінавацілася іншай фірме

Гісторыя даверлівай пенсіянеркі.

У рэдакцыю «Вечернего Гродна» звярнулася чытачка Валянціна Фёдараўна і распавяла, што ў пачатку ліпеня ёй тэрмінова спатрэбіліся 3500 рублёў, каб выплаціць пазыку дачкі, якая на той момант не працавала.

«Лепш бы я іх на лекі выдаткавала»

- Мне 66 гадоў, пенсія ўсяго пяцьсот рублёў, нават не думала, што крэдыт могуць даць. Дачка знайшла ў інтэрнэце фірму, маўляў, дапамогуць аформіць. Гляджу тэлевізар, слухаю радыё, газеты чытаю, ведаю, як могуць падмануць. Але тут з уласнай дурасці так нагрэлі! - распавядае жанчына, ледзь стрымліваючы слёзы.

Разам з дачкой пайшлі ў паказаную кантору. Там, са слоў Валянціны Фёдараўны, іх не папярэдзілі, што крэдыт не даюць, а толькі знаходзяць банк, дзе яго можна аформіць. Даверлівая жанчына ўдавацца ў падрабязнасці не стала, дамову не прачытала і падпісала яе. У лічаныя хвіліны ад крэдытнага брокера прыйшла SMS з назвамі банкаў.

Не надаўшы гэтаму значэння, Валянціна Фёдараўна ў той жа дзень па шляху дадому зайшла ў банк, дзе атрымлівае пенсію, каб пацікавіцца, ці дадуць крэдыт, і дакументы без праблем аформілі. Ад паслуг крэдытнага брокера адразу адмовілася.

І ўсё бы нічога, калі б праз тыдзень на мабільны тэлефон пенсіянеркі не прыйшла SMS, што яна павінна заплаціць брокеру 725 рублёў, бо скарысталася іх паслугай і аформіла крэдыт у рэкамендаваным фірмай банку. Прычым пералічыць грошы трэба цягам трох дзён.

- Тэлефанавала дзяўчына з фірмы і сказала, што, паводле дамовы, два месяцы нельга ўкладаць угоды з банкамі. Як так? Чаму я не магу карыстацца іх паслугамі? Я ў гэтым банку заробак атрымлівала, цяпер пенсію, - здзіўляецца Валянціна Фёдараўна. - Ды і адкуль такая сума?

Са слоў пенсіянеркі, яна і раней брала крэдыты, не чытаючы дамовы, бо «там усё празрыста». Аплаты ўносіла своечасова, крэдытная гісторыя чыстая, ніякіх праблем з законам не мела. Прапрацавала на адным прадпрыемстве сорак гадоў, мае шмат грамат. Аднак, нагледзеўшыся праграм аб калектарах, спалохалася і вырашыла «паслугу» аплаціць. Давялося ўзяць другі крэдыт.

- Лепш бы я іх на лекі выдаткавала, чым так выкінула! - плача пенсіянерка. Яна не спадзяецца вярнуць грошы, але хоча, каб іншыя ведалі, як можа быць.

Пратэрмінаваў 10 дзён - штраф

Кампанія, у якую звярталася Валянціна Фёдараўна, афіцыйна зарэгістраваная. Офісы ёсць па ўсёй краіне, у тым ліку і ў Гародні. Ён знаходзіцца ў цэнтры горада. У кампаніі маюцца юрыдычны адрас у Менску, тэлефоны і свой сайт. Праўда, пры наведванні яго складваецца ўражанне, быццам фірма не проста пасярэднік паміж кліентам і банкамі, а сама дае крэдыты. На старонцы падрабязна апісваецца, якія спажывецкія крэдыты, пазыкі на жыллё ці аўтамабіль можна атрымаць, на які тэрмін і пад якія адсоткі.

Што тычыцца дамовы, то ў ёй, здаецца, прапісаныя ўсе нюансы, не падкапаешся. Праўда, умовы дзіўныя. Напрыклад, падчас тэрміну дзеяння дамовы (два месяцы) нельга ўкладаць угоды з банкамі без узгаднення з кампаніяй.

Аплаціць паслугі (725 рублёў) трэба цягам трох каляндарных дзён і толькі праз АРІП. Не заплаціў своечасова - пеня 5% ад кошту паслуг за кожны дзень пратэрміноўкі, пратэрмінаваў больш за 10 дзён - плюс 30% штрафу. Акрамя таго, за парушэнне тэрмінаў аплаты фірма можа павялічыць адсоткі за карыстанне чужымі грашыма.

Каб скасаваць дамову, трэба накіраваць матываваную адмову ў Менск. Апавяшчэнне можа разглядацца да 30 дзён. Наўрад ці той, каму тэрмінова патрэбныя грошы, стане гэта рабіць. Калі кліент захоча звярнуцца ў суд, то толькі ў Менск.

Дарэчы, у такую ж сітуацыю год таму трапіла яшчэ адна пенсіянерка. Жанчына хацела ўзяць крэдыт на лячэнне мужа, але завінавацілася крэдытнаму брокеру амаль 1500 рублёў. Тады, праўда, кіраўніцтва кампаніі пайшло насустрач і суму паменшылі да 200 рублёў.

У тэму

Са слоў старшыні ГА «Гродзенскі цэнтр прававой дапамогі спажыўцам» Жанны Гасцеевай, прачытаўшы дамову, можна сказаць, што фармальна ўмовы падачы інфармацыі пра паслугу фірмай выкананыя (як таго патрабуе артыкул 7 Закона «Аб абароне правоў спажыўцоў»): паказаная цана паслугі, прадмет і тэрмін дзеяння дамовы, парадак разліку. Жанчыне варта было ўважліва прачытаць дамову, перш чым яе падпісваць.

Галоўнае - ці былі зробленыя канкрэтныя дзеянні ў выкананні паслугі. Калі так (напрыклад, быў прадстаўлены спіс банкаў, дзе б пенсіянерцы аформілі крэдыт), то фармальна паслуга нададзеная. Іншае пытанне - наколькі разумны кошт за яе.

Дарэчы, у судзе такія справы ўжо былі, але ўсе пастановы пакуль выносіліся не на карысць спажыўцоў.