Колькі будзе каштаваць навучанне ў папулярных ВНУ Беларусі з 1 верасня

Беларускія ВНУ падымаюць кошт навучання.

Беларускія ВНУ падымаюць кошт навучання. «Комсомольская правда» даведалася, колькі будзе каштаваць год вучобы паводле новых тарыфаў у самых папулярных універсітэтах краіны

БДУ

Загад аб павышэнні кошту навучання падпісаў і рэктар Беларускага дзяржаўнага ўніверсітэта. Напрыклад, студэнтам 1-3 курсаў мехмата давядзецца плаціць на дзённым за навучанне ў год 3622 рублі, на факультэце радыёфізікі і кампутарных тэхналогій - 4052, на эканамічным факультэце - 4866, на юрфаку ад 4406 да 5061. Мінімальны кошт у прайсе ВНУ на ФФСН і філалагічным факультэце. З першага па трэці курс кошт навучання паводле спецыяльнасцяў «расейская філалогія (па накіраванню)», «сацыяльная работа (па накіраванню») складзе 3190 рублёў.

- Цэны не павысіліся, а прыведзены ў адпаведнасць з рэальнымі выдаткамі на навучанне. Павелічэнне платы за навучанне студэнтаў 1-5-х курсаў БДУ складае 10% па ўніверсітэце, - растлумачылі ў прэс-службе ВНУ.

БНТУ

У новым навучальным годзе студэнтам палітэха давядзецца плаціць за навучанне ў сярэднім на 9,9% больш. Падвысяцца цэны і для першакурснікаў. На большасці факультэтаў плата за навучанне на дзённай форме складзе 4263 беларускіх рублёў. Мінімальны кошт - 3996. У мінулым навучальным годзе гэтыя сумы складалі ад 3633 да 3875 рублёў.

На сайце БНТУ растлумачылі, што кошты на навучанне карэктаваліся з улікам павышэння сумы базавай стаўкі з 185,00 рублёў да 195,00 рублёў і базавай велічыні з 27,00 рублёў да 29,00 рублёў. На рост коштаў таксама паўплывала павелічэнне мінімальнага заробку з 375,00 рублёў да 400,00 рублёў.

- Ад гэтых паказчыкаў залежаць сумы акладаў і стымулюючых і кампенсуючых выплат работнікам. Астатнія выдаткі (паслугі сувязі, камунальныя паслугі і т. д.), уключаныя ў кошт навучання, разлічаны ў адпаведнасці з дзейнымі нормамі і нарматывамі. Кошт электрычнай і цеплавой энэргіі ўключаны ў межах устаноўленых заканадаўствам тарыфаў і нормаў іх расходу, - гаворыцца ў паведамленні БНТУ.

БДУІР

Новыя цэны з'явіліся і на сайце гэтай ВНУ. Ад 2815 да 3900 рублёў у залежнасці ад курсу з 1 верасня будзе каштаваць дзённае навучанне на факультэце кампутарных сістэм і сетак (усе спецыяльнасці). На факультэце інфармацыйных тэхналогій і кіравання, інжынерна-эканамічны факультэт на ўсіх спецыяльнасцях студэнты будуць плаціць ад 2595 да 3900 рублёў у залежнасці ад курса. Найбольш нізкія цэны на дзённым устаноўлены на спецыяльнасці напрамкі адукацыі «Прафесійнае навучанне» на факультэце радыётэхнікі і электронікі. Першакурснікі тут будуць плаціць 2700 рублёў, трэці курс - 2385.

У сярэднім, кошты на навучанне ў кузні айцішнікаў, як і ў іншых ВНУ, выраслі не болей, чым на 10%.

БДМУ

- Разлікі выніковага кошту навучання знаходзяцца ў бухгалтэрыі на завяршальнай стадыі. Хутка інфармацыя з'явіцца на сайце. У нашай ВНУ, як у іншых, павышэнне ў сярэднім не павінна перавысіць 10%. Мы апошні раз паднімалі кошт навучання ў сакавіку 2020 года. З таго часу ўзраслі выдаткі і на заробак, і на плату транспартных паслуг, і на сувязь. Вельмі дарагія расходныя матэрыяльныя на медыцынскае забеспячэнне. Фактычна, гэта не павышэнне коштаў, а рэальныя затраты на кошт навучання, - растлумачылі ў прэс-службе БДМУ.

БДПУ

З 1 верасня паводле новага прайсу будуць вучыцца і студэнты Белдзяржпедуніверсітэта імя Максіма Танка. Адны з самых дарагіх «спецыяльнасці з вывучэннем замежнай мовы». Напрыклад, кошт навучання па іх на дзённай форме для першага курсу ў новым навучальным годзе - 3226 рублёў, у мінулым - 2932 рубля.

- У сярэднім кошт навучання павялічваецца на дзённай форме атрымання адукацыі ад 200 да 300 рублёў у год, на завочнай форме атрымання адукацыі ад 85 да 155 рублёў у залежнасці ад спецыяльнасці. Кошт навучання на платнай аснове, не карэктаваўся з 1 сакавіка 2020 года, - тлумачаць у прэс-службе.

БДЭУ

Аб павышэнні кошту навучання заявілі ў БДЭУ. На сайце ВНУ з'явілася інфармацыя, што кошт дзённай формы навучання для першакурснікаў з новага навучальнага года складзе 2892 рубля без ПДВ для ўсіх спецыяльнасцяў і факультэтаў, для 2-4 курсаў - 2832 без ПДВ. Кошты для завочнікаў павысяцца да 1032 рублёў без ПДВ.

- Кошт навучання на дзённай форме падвысіцца на 7,1% у параўнанні з мінулым навучальным годам. На завочным павышэнне крыху больш, чым на 5%, - растлумачылі ў прыёмнай камісіі.