Чаму з беларускіх крамаў знікае цукар?
- 29.09.2021, 10:40
- 11,222
Агучаныя некалькі версій.
Па ўсёй Беларусі праблемы з цукрам у крамах. Гэта яшчэ не татальны дэфіцыт: дзесьці цукар знікае, з'яўляецца і зноў знікае; дзесьці кошты вышэйшыя; дзесьці можна ўбачыць пустыя паліцы, а ў суседняй краме цукар на месцы.
«Белсат» паспрабаваў высветліць, што адбываецца.
Шмат дзе знікае цукар-пясок, хоць рафінад застаецца ў продажы. У Менску з другой паловы мінулага тыдня рэгулярна можна ўбачыць пустыя паліцы там, дзе быў цукар, але ў іншай краме побач цукар на месцы. У Барысаве бывае, што можна знайсці толькі цукар катэгорыі «экстра» за 2 рублі 11 капеек за 1 кг, калі кошт «стандартнага» быў 1,78 р. У Быхаве звычайны цукар ужо бачылі за 2,05 р. У райпо Івацэвіцкага раёна цукру прывозяць мала, ён адразу знікае. Чытач з Мядзела кажа, цукру «няма і не прадбачыцца». У Віцебскай вобласці продаж цукру абмежавалі 2 кілаграмамі на чалавека...
Версіі выказваліся такія:
Магчыма, рэч у росце коштаў у свеце і ў суседняй Расеі: больш выгадна вывозіць цукар за мяжу, чым прадаваць у Беларусі з замарожаным коштам.
Магчыма, праблема ў дрэнным ураджаі: праз спёку буракі не набралі своечасова дастатковай масы і цукровасці.
Магчыма, бяда ў песімістычных чаканнях пастаўшчыкоў і задоўжванні паставак, каб потым прадаць цукар даражэй.
Магчыма, яго везці не хочуць: кошты паліва выраслі, а расцэнкі на перавозку засталіся ранейшымі.
Што кажуць на цукровым камбінаце?
Высокапастаўлены супрацоўнік аднаго з цукровых камбінатаў кажа «Белсату»: праблемаў з вытворчасцю няма, сыравіны было дастаткова. Працуе і ягоны завод, і іншыя. І ўсе машыны, якія прыязджаюць на камбінат, загружаюць цукрам, а адгрузка за апошні месяц вырасла ўдвая.
«Проста рэзкі ажыятаж насельніцтва, гандаль быў не гатовы, – запэўніваюць на цукровым камбінаце. – На цукровых камбінатах цукар ёсць, адгружаем, падоўжаныя дні адгрузкі. Цукру было дастаткова, проста рэзкі ўсплёск. Накруцілі насельніцтва, што падаражэе цукар, і насельніцтва кінулася набываць.
Гандаль можа недзе эканоміць: не хочуць пасылаць аўтатранспарт, чакаюць чыгунку, а вагоны заказаныя загадзя. Калі б захацелі, забяспечылі насельніцтва цалкам. Цукар на складах ёсць, уся праблема ў гандлі».
Але асноўная праблема, кажа прадстаўнік завода, у тых пакупніках, якія замест кілаграма цукру бяруць дзесяць, бо чакаюць падаражання і «робяць дома склады». На думку суразмоўцы, усплёск разавы: пройдзе яшчэ тыдзень, і людзі ўбачаць, што цукар ёсць, і попыт сыдзе.
А што кажуць у крамах?
Прадстаўнік адной з найбуйнейшых сетак кажа «Белсату», што нават не чуў нараканняў на адсутнасць цукру ці праблемы з пастаўкамі, хоць пра пустыя паліцы паведамлялі ў тым ліку ў крамах ягонай сеткі.
У іншай сетцы запэўніваюць: рост попыту бачаць, робяць павялічаныя заказы. Але для дастаўкі і выкладкі тавару патрэбны час. А попыт большы і ў параўнанні з мінулым месяцам, і ў параўнанні з тым самым месяцам мінулага года.
«Мы бачым, што прадаем больш – і заказваем больш, выстаўляем тавар на паліцы, – кажуць у гандлёвай сетцы. – Попыт вырас у некалькі разоў. Дакладныя лічбы ў цэлым не скажу, але гаворка можа ісці пра рост у два-тры разы ў залежнасці ад канкрэтнага рэгіёну, канкрэтнай крамы».