Як беларусам зэканоміць на аплаце цяпла

Ці працуе метад ад ЖКГ?

«Ці ведаеце вы, як можна зэканоміць у ацяпляльны перыяд? Хочаце мець зніжку 5–10% на цеплавую энэргію цэлыя тры гады?» – ЖКГ выпусціла памятку з рэкамендацыямі.

Для эканоміі ў ЖКГ параілі ўсталяваць лічыльнікі цяпла ў кватэры. Там адзначылі, што ўстаноўка індывідуальных прыбораў уліку павінна ажыццяўляцца ў сукупнасці з прыборамі рэгулявання, каб ва ўласніка была магчымасць уплываць на спажыванне цяпла.

Якія плюсы ў лічыльнікаў?

Выдатак энэргіі ніжэйшы на 15–20%

Месячная плата за цяпло залежыць не ад плошчы жылля, а ягонага рэальнага спажывання – у кватэрах, дзе халадней, плацяць менш, дзе цяплей – больш.

10% зніжка на цеплавую энэргію цягам 3 гадоў, калі ІАУ ўстаноўленыя спажыўцамі за кошт уласных сродкаў, або 5% зніжка цягам 3 гадоў, калі ўласнікі пачнуць плаціць за цяпло паводле ІПУ, якія былі ўсталяваныя ў кватэры раней, але іх ніхто не выкарыстоўваў.

Як усталяваць?

Гарызантальная разводка сістэмы

Лічыльнікі цяпла (ПІУ) усталёўваюцца ў новым жылфондзе, у дамах з гарызантальнай разводкай сістэмы ацяплення. Прынцып працы лічыльніка заключаецца ў падліку аб'ёму гарачай вады, якая прайшла па трубе, на якой змантаваны датчык.

Яго можна ўсталяваць у асобнай кватэры, калі ў доме гарызантальная сістэма ацяплення.

Вертыкальная разводка сістэмы

А ў дамах з вертыкальнай разводкай сістэмы ацяплення (а гэта амаль увесь стары жылфонд) усталёўваюцца размеркавальнікі цяпла (РЦ) на батарэі. Яны перыядычна фіксуюць тэмпературу яе паверхні ў месцы мацавання і тэмпературу паветра ў памяшканні. У памяць прыбора запісваецца розніца паказанняў. Звесткі выкарыстоўваюць для спецыяльнага разліку спажытага цяпла.

У ЖКГ звяртаюць увагу, што «ўсталяваць індывідуальныя прыборы ўліку цяпла зручней і танней у рамках капітальнага рамонту жылога дома. Але гэтую пастанову неабходна прымаць на стадыі праектавання працаў для капрамонту».

У гэтым выпадку ўласнікам кватэраў трэба звярнуцца ў арганізацыю, якая кіруе домам, – кіраванне таварыства ўласнікаў, ЖБВК або дзяржаўную службу заказчыка (ЖКГ). Пасля кіраванне / арганізацыя ЖКГ праводзіць сход уласнікаў кватэраў дома. Пагадзіцца на ўсталяванне прыбораў павінны мінімум 75% удзельнікаў супольнага домаўладання. Далей вырабляецца разлік, абвяшчаецца кошт працаў, пасля чаго цэнтралізавана ажыццяўляецца набыццё абсталявання. Кіраванне / ЖКГ выбірае падрадніка (праводзіцца конкурс), які зоймецца ўстаноўкай РТ.

Як плаціць?

Паведамляюць, што, нягледзячы на прыборы, спачатку налічаецца плата за ацяпленне паводле паказнікаў агульнадамавога лічыльніка. Ужо пасля будзе зроблены пераразлік аплачанай сумы, зыходзячы з паказанняў лічыльніка.

Але калі лічыльнік або размеркавальнікі падлучаныя да сістэмы аддаленага збору звестак, то аплачваць трэба штомесяц, зыходзячы з фактычнага спажывання цяпла.