Вышыня гары Манблан паменшылася амаль на метр

Афіцыйная вышыня Манблан зніжаецца ўжо больш за дзесяць гадоў.

Французскія экспэрты заявілі, што вымералі самую высокую гару Заходняй Еўропы Манблан і яна была амаль на метр ніжэйшай за яе папярэднюю афіцыйную вышыню.

Пра гэта паведамляе «Европейская правда» са спасылкай на The Local.

Са слоў экспэртаў, пасля экспедыцыі ў сярэдзіне верасня гара ў цэнтры французскіх Альп была вышынёй 4 807,81 метра, што ніжэй за апошнюю апублікаваную ацэнку ў 4 808,72 метраў у 2017 годзе.

«Цяпер кліматолагі, гляцыёлагі і іншыя навукоўцы павінны перагледзець усе сабраныя звесткі і высветліць усе тэорыі для тлумачэння гэтай з'явы», - сказалі яны на прэс-канферэнцыі ў горадзе Сен-Жэрве-ле-Бэн ля падножжа Манблан.

Афіцыйная вышыня Манблан зніжаецца ўжо больш за дзесяць гадоў. Самы высокі паказчык складаў 4810,90 метра ў 2007 годзе. Са слоў геаграфічных экспэртаў, гара штогод страчвае ў сярэднім 13 сантыметраў вышыні.

Мэтай рэгулярных вымярэнняў з'яўляецца стварэнне мадэлі ледзянога покрыва і прадстаўлення дакладнага банка звестак, які стане даступным для ўсіх экспэртаў.

Паказчыкі змяняюцца з году ў год, бо вяршыня пакрытая пластом пастаяннага снегу, што змяняецца пры моцным ветры і ападках.

«Здаўна вышыня Манблан пастаянна змянялася», - сказалі экспэрты, адзначыўшы, што «скалістая» частка вяршыні дасягае піку ў 4792 метры.