Па Магілёве ходзіць бусел, які дагэтуль не паляцеў на поўдзень

Людзей не баіцца, «мігруе» па мікрараёнах.

Чытачы партала Zerkalo.io распавялі, што на адной з ажыўленых вуліц Магілёва ходзіць бусел і нікуды не ляціць, а яго суродзічы ўжо накіраваліся на поўдзень. Неабыякавыя гараджане хвалююцца за птушку, але не ведаюць, што з ёй рабіць. Ужо выклікалі міліцыю і ратавальнікаў, але птушкай ніхто не зацікавіўся. Арнітолагі кажуць, што ўсё ж невялікая частка белых буслоў - хворых ці прыручаных чалавекам - застаецца зімаваць у Беларусі. І некаторыя з іх з холадам спраўляюцца даволі паспяхова.

Чытачы распавядаюць, што невялікі бусел ужо некалькі дзён ходзіць па вуліцы Сіманава ў абласным цэнтры. Гараджане мяркуюць, што птушка не можа лятаць.

Спачатку неабыякавыя жыхары выклікалі міліцыю.

- Прыехала машына. Міліцыянты паглядзелі і з'ехалі, сказаўшы, што гэта не іх кампетэнцыя. Патэлефанаваў у 101. Там сказалі, што бусла бачылі ўчора ў іншым раёне Магілёва, ён ручны і цягнецца да людзей, таму што яны кормяць яго. Сказалі, што ўсё ў парадку. Але большасць людзей кідаюць буслам хлеб і вельмі дзівяцца, калі я ім кажу, што буслы драпежныя і ядуць мяса, - распавёў адзін з відавочцаў.

Спецыялісты грамадскай арганізацыі «Ахова птушак Бацькаўшчыны» амаль кожны дзень атрымліваюць пытанні ад беларусаў, якія хвалююцца за лёс буслоў, што не адляцелі зімаваць у Афрыку.

На сайце арганізацыі нават сабралі адказы на самыя папулярныя пытанні пра гэтых птушак.

Белыя буслы ляцяць на поўдзень звычайна ў канцы жніўня, але дажджы могуць на некаторы час затармазіць запланаваны палёт у гарачыя краіны, але, як толькі становіцца цяплей, птушкі выпраўляюцца ў дарогу.

Са слоў дырэктара грамадскай арганізацыі Аляксандра Вінчэўскага, зімаваць у Беларусі застаецца толькі невялікая частка белых буслоў: гэта хворыя асобіны або тыя птушкі, якія былі прыручаныя чалавекам. Звычайна яны праводзяць холад на невялікіх не замёрзлых рэках. Голад, са слоў спецыяліста, буслам больш страшны, чым холад.

- Тых буслоў, якія засталіся, можна падкормліваць размарожанай рыбай або мяснымі адкідамі. Цёплае памяшканне ім не заўсёды трэба. Але гэта калі птушка сытая і мароз не ніжэй за -15 °С. А калі бусел жыве ў двары ці ў памяшканні, неабходна аформіць акт канфіскацыі птушкі з дзікай прыроды ў раённай інспекцыі прыродных рэсурсаў і аховы навакольнага асяроддзя. Вясной яго можна будзе выпусціць на волю, - расказаў спецыяліст.

У Беларусі ёсць некалькі арганізацый, куды можна звярнуцца па дапамогу, калі бусел паранены: Гарадзенскі заапарк, прыватнае прыродаахоўная ўстанова «Ахова прыроды» ў Асіповіцкім раёне Магілёўскай вобласці і Цэнтр дапамогі дзікім жывёлінам «Сірын» каля Менска. Памятку аб тым, як дзейнічаць, калі вы знайшлі параненую птушку, можна прачытаць на сайце грамадскай арганізацыі «Ахова птушак Бацькаўшчыны».