«Абяцалі 10%, а далі - нуль»

Як случчанка схадзіла па скідку для імяніннікаў у супермаркет.

Случчанка распавяла «Кур'еру», на яе думку, павучальны для іншых выпадак, які адбыўся з ёй у буйным супермаркеце Слуцка.

«Я часта бяру прадукты ў «Віталюры», ёсць і картка гэтай крамы. Напярэдадні дня нараджэння мне прыйшло паведамленне на тэлефон ад гэтай крамы. Прапаноўвалі зрабіць пакупкі і атрымаць персанальную зніжку для імянінніка - 10%.

Сабраліся з сяброўкай і пайшлі. Набыла паўфабрыкаты з мяса, сыр, каўбасу. Калі падышла да касы, то сказала, што хачу атрымаць скідку для імянінніка. Дала картку «Віталюру», пенсійнае пасведчанне, пашпарт, дзе пазначаны дзень нараджэння. «Усё адпавядае!» - сказала касірка. Яна сказала, што скідка не распаўсюджваецца на алкагольную, тытунёвую прадукцыю, акцыйныя тавары. Але іх у мяне не было.

Калі я адышла ад касы і паглядзела ў чэк, то было такое расчараванне. Мне зрабілі скідку толькі на пакуначак - 9 капеек. А на ўсе астатнія прадукты - нуль! Адчула сябе ашуканай, але разбірацца не пайшла, каб не псаваць і так сапсаваны настрой.

Як, беручы тавар з паліцы, я магла даведацца, што на яго мне скідку не зробяць? Ніякіх спісаў нідзе не відаць. Навошта тады гэтую рэкламу даваць, калі атрымаць можна толькі расчараванне. Вось была такая акцыя для імяніннікаў у краме «Вясёлка» на вул. 14 Партызан. Так прыходзіў, паказваў пашпарт - і ўручалі каробку цукерак. Усё зразумела. А тут абяцалі ў падарунак зніжку - дзе яна? Расказваю пра гэта, каб папярэдзіць іншых, якія спадзяюцца на падарунак і не атрымаюць нічога.

Даведаліся ў «Віталюры», чаму так атрымалася

Журналісты патэлефанавалі ў сектар клопату аб кліентах крамы «Віталюр», апісалі сітуацыю і спыталі: «Чаму так атрымалася і як даведацца пакупніку да аплаты, ці атрымае ён на гэтыя тавары зніжку па акцыі для імянінніка?»

Спецыялістка сектара папрасіла назваць інфармацыю з чэка пакупніцы і сказала, што на прадукты ў чэку пакупніцы акцыя для імянінніка не распаўсюджваецца.

Яна растлумачыла, што зніжкі надаюцца паводле праграмы лаяльнасці, з якой пакупнік можа азнаёміцца на сайце або ў «Кутку для пакупніка» ў краме. Там ёсць спіс тавараў, на якія зніжка не распаўсюджваецца. Гэта:

1. тавары, кошты якіх зніжаныя (удзельнічаюць у акцыі, уцэнены тавар);

2. упакоўка (пакеты, латкі, кантэйнеры, каробкі);

3. тытунёвая прадукцыя;

4. алкаголь, піва, напоі слабаалкагольныя;

5. тавары, цэны і нацэнкі на якія рэгулююцца дзяржавай;

6. іншыя тавары на меркаванне арганізатара праграмы.

Каб пакупніку даведацца, ці распаўсюджваецца зніжка на тавар, які ён хоча набыць, трэба звярнуцца да супрацоўніка гандлёвай залы.