«СветлагорскХімвалакно» патрапіла пад санкцыі ЗША
- 4.10.2022, 11:39
- 5,164
Кіраўніцтва прадпрыемства спрабуе рабіць выгляд, што нічога не адбылося.
Светлагорскае горадаўтваральнае прадпрыемства ААТ «СветлагорскХімвалакно» трапіла пад санкцыі ЗША, піша zerkalo.io.
- Гэтыя санкцыі ... Я скажу так: хай неафіцыйна, але гэтыя абмежаванні ў працы ў дачыненні да нас былі ўведзеныя даўным-даўно, - пракаментаваў навіну генеральны дырэктар ААТ «СветлагорскХімвалакно» Васіль Касцюкевіч. - Проста гэта стала цяпер больш відавочным. Мы ж як працавалі, так і працуем.
Падаецца, кіраўніцтва прадпрыемства дарэмна спрабуе рабіць выгляд, што нічога не адбылося.
30 верасня Злучаныя штаты Амерыкі ўвялі новы пакет санкцый у дачыненні да Расеі ў сувязі з правядзеннем фіктыўных рэферэндумаў і анэксіяй украінскіх тэрыторый. У яго ўвайшлі крыху менш за трыста фізічных асоб і адзінаццаць прадпрыемстваў.
Разам з імі пад санкцыі трапіла і беларускае прадпрыемства - вытворца тэкстылю і валокнаў ААТ «СветлагорскХімвалакно». ЗША ўстанавілі, што яно «пастаўляе найважнейшыя матэрыялы для расейскай абароннай прамысловасці».