Reuters: УСУ на поўдні дамагліся найбольшага прарыву з пачатку вайны

Акупантаў ужо выбіваюць з Дудчан за 30 км ад месца прарыву фронту.

Украінскія сілы дабіліся найбольшага прарыву на поўдні з пачатку поўнамаштабнага ўварвання Расеі, прарваўшы расейскую абарону і хутка рухаючыся ўздоўж ракі Дняпро, паведаміла інфармацыйнае агенцтва Reuters (пераклад - krymr.com).

Са звестак агенцтва, Кіеў не падаў шмат інфармацыі аб поспехах на поўдні, але расейскія крыніцы прызналі, што ўкраінскія войскі прасунуліся на дзясяткі кіламетраў уздоўж заходняга берага ракі, адваяваўшы шэраг населеных пунктаў.

У каментары расейскаму дзяржаўнаму тэлебачанню прызначаны Расеяй кіраўнік акупацыйнай адміністрацыі ў Херсонскай вобласці Уладзімір Сальда паведаміў аб прарыве УСУ каля пасёлка Дудчаны.

Як адзначаюць журналісты Reuters, гэты пасёлак размешчаны прыкладна за 30 км на поўдзень ад месца фронту да прарыву - гэта паказвае на хуткае прасоўванне на поўдні.

У Генштабе УСУ імклівае прасоўванне на поўдні яшчэ не пацвердзілі, але ўкраінскія вайскоўцы і мясцовыя чыноўнікі апублікавалі некаторыя падрабязнасці. Дэпутат Херсонскага аблсавета Сяргей Хлань назваў Асакароўку, Міхайлаўку, Крашчанаўку і Залатую Бэльку дэакупаванымі населенымі пунктамі.

3 кастрычнік Украіны Уладзімір Зяленскі паведаміў, што контрнаступ УСУ працягваецца, ёсць новыя вызваленыя населеныя пункты ў некалькіх абласцях, але іншых падрабязнасцяў ён не падаў. Напярэдадні паведамлялася аб вызваленні двух населеных пунктаў у Херсонскай вобласці - Архангельскага і Міралюбаўкі. 2 кастрычніка ва ўкраінскім аператыўным камандаванні "Поўдзень" без падрабязнасцяў паведамілі, што "поспехі ёсць", а абстаноўка мяняецца вельмі дынамічна.