Украінскае войска прабіваецца да Луганшчыны і гатовае атакаваць галоўную трасу забеспячэння ворага
2- 5.10.2022, 10:41
- 7,654
Брытанская выведка паведаміла пра значныя поспехі ў наступе УСУ на двух франтах.
Украіна прадаўжае дамагацца поспехаў у наступальных аперацыях як на паўночна-ўсходнім, так і на паўднёвым франтах.
Пра гэта паведамляе Міністэрства абароны Вялікай Брытаніі ў Twitter.
Як адзначаецца ў зводцы, на паўночным усходзе, у Харкаўскай вобласці, Украіна ў цяперашні час заняла значную частку тэрыторыі на ўсход ад ракі Аскол. Украінскія злучэнні рушылі за раку да 20 км у паласу абароны Расеі ў бок вузла забеспячэння горад Сватава.
«Вельмі верагодна, што Украіна цяпер можа нанесці ўдар па ключавой дарозе Сватава – Крамянная з большасці сваіх артылерыйскіх сістэмаў, што яшчэ больш абмяжуе магчымасці Расеі ў папаўненні сваіх падраздзяленняў на ўсходзе», – гаворыцца ў паведамленні.
У палітычным плане расейскае кіраўніцтва, хутчэй за ўсё, будзе занепакоенае набліжэннем перадавых украінскіх падраздзяленняў да межаў Луганскай вобласці, якую, як заявіла Расея, афіцыйна анексавала ў мінулую пятніцу, адзначаюць у Мінабароны Брытаніі.
Нагадаем, паводле звестак брытанскай выведкі, Украіна актывізавала свае наступальныя аперацыі на паўночным усходзе краіны. Часткі прасоўваюцца як мінімум на двух кірунках на ўсход ад рэк Аскол і Северскі Данец, дзе групаваліся сілы УСУ пасля папярэдняга наступу ў пачатку верасня.