Аршанскі райвыканкам збіраецца выдаткаваць амаль $10 тысяч на рамонт адной прыбіральні

Фінансуецца рамонт за рахунак бюджэтных сродкаў.

Закупку з адной крыніцы паслуг для рамонту санвузла ў правым крыле на 3-м паверсе абвясціў Аршанскі раённы выканаўчы камітэт, піша тэлеграм-канал «Беларусь за МКАДам».

Згодна з дэфектным актам, у чыноўніцкай прыбіральні патрэскалася плітка на сценах і падлозе, пачала адыходзіць ад паверхні, месцамі ёсць скразныя адтуліны, бачкі ўнітаза і ракавін маюць расколіны і сколы, столь правісла, дзверы дэфармаваліся, разеткі і выключальнікі няспраўныя.

На санітарна-тэхнічныя працы мяркуецца выдаткаваць 6 500 BYN, на аздабленне падлог – 8 910 BYN, аздабленне сцен і столі – 9 590 BYN.

Пры плошчы падлогі на 14,6 квадратных мераў, сярэдні кошт работ і матэрыялаў на адзін квадратны метр выходзіць 610 BYN або больш за 250 USD паводле курсу Нацбанка; агульная плошча сцен і столі складае 87,2 метра, а «квадрат» абыдзецца на 109 BYN або 45 USD.