У Бранскай вобласці РФ загарэліся рэзервуары з нафтапрадуктамі

Што стала прычынай узгарання, пакуль невядома.

У Суражскім раёне Бранскай вобласці гараць рэзервуары з нафтапрадуктамі, паведаміў губернатар рэгіёну Аляксандр Багамаз у сваім тэлеграм-канале.

«На месцы працуюць пажарна-выратавальныя разлікі. Плошча пажару складае 1800 кв. м. Да тушэння прыцягнута больш за 80 чалавек і 30 адз. тэхнікі, у тым ліку пажарны цягнік. Дадаткова накіравана аэрамабільная групоўка ГУ МНС Расеі Бранскай вобласці», - напісаў ён.

Звестак аб пацярпелых, паводле ягоных слоў, не паступала. Што стала прычынай узгарання, Багамаз не ўдакладніў.

16 лістапада ў сяле Азараўка Старадубскай муніцыпальнай акругі Бранскай вобласці двое мясцовых жыхароў, якія перасоўваліся на аўтамабілі, падарваліся на міне. Яны атрымалі раны, іх накіравалі ў лякарню.

У той жа дзень кіраўнік Арлоўскай вобласці Андрэй Клычкоў паведаміў, што беспілотнік падарваў нафтабазу ў вёсцы Сталёвы Конь. Пацярпелых не было. Іншых дэталяў кіраўнік рэгіёна не падаў.

6 лістапада губернатар Белгарадскай вобласці Вячаслаў Гладкоў заявіў, што ў Грайваронскай гарадской акрузе адбылося ўзгаранне ў рэзервуары з растваральнікам пасля абстрэлу завода з украінскага боку. Пацярпелых у выніку здарэння не было.

Арлоўская вобласць мяжуе з Бранскай і Курскай абласцямі, якія, у сваю чаргу, як і Белгародская вобласць, мяжуюць з Украінай.