Вайсковы экспэрт: Расейцы ваююць на ўзроўні 19 стагоддзя

Расея не ўмее ваяваць мабільнымі групамі.

Пра гэта «24 каналу» распавёў генерал-маёр СБУ ў запасе Віктар Ягун. Ён адзначыў, што Расея адмовілася ад фармавання батальённых тактычных груп у сваім войску.

Генерал-маёр растлумачыў, што такія батальённыя тактычныя групы прадугледжваюць больш сучаснае выкарыстанне Узброеных сіл, прынамсі, кіраванне малымі падраздзяленнямі.

Расея не ўмее ваяваць мабільнымі групамі

Ягун адзначыў, што малыя падраздзяленні могуць канцэнтраваць усе існыя вайсковыя магчымасці, напрыклад артылерыю, мотапяхоту, уласную лагістыку і самастойнае прыняцце пастаноў. Расейцы не ўмеюць так кіраваць сваім войскам.

«Гэта закарэлае кіраванне войскамі і спроба мадэрнізаваць падраздзяленні на вышэйшым узроўні - усё ў комплексе паказвае, што Расея так і не змагла перайсці на больш сучасны ўзровень і засталася на ўзроўні канца 19 - пачатку 20 стагоддзя», - упэўнены Ягун.

На яго думку, расейцы вымушаныя пераходзіць да ранейшай дывізіённай сістэмы вайсковай падрыхтоўкі. Напрыклад, яны аб'ядноўваюць падраздзяленні. У іх ёсць асобна пяхота, мотапяхота, танкавыя войскі і артылерыя.

«Яны не могуць забяспечыць маленькія падраздзяленні ўсім неабходным лагістычна, ім значна лягчэй ведаць, што асобна ідзе лагістыка на артылерыю, асобна на танкі, асобна на мотапяхоту», – заўважыў генерал-маёр.

Ягун падкрэсліў, што насамрэч сучасная вайна зусім іншая. Гэта мабільная вайна, і ніхто не праводзіць цяпер франтальныя наступы мільённымі групоўкамі, тысячамі танкаў і сотнямі тысяч артылерыі.

Генерал-маёр СБУ ў запасе мяркуе, што Расея фактычна прызнала, што не можа ваяваць паводле сучасных узораў і зрабіла некалькі крокаў назад.

«Расейцы - гэта нацыя, якая не разумее, што адбываецца і не жадае разумець. Яны могуць страціць і мільён, і два, і дзесяць. Іх гэта не спыніць, на жаль», – падсумаваў Ягун.