Найбуйнейшы пакупнік расейскага газу ў Нямеччыне падаў пазоў да «Газпрама» на мільярды еўраў

Пазоў пададзены ў Стакгольмскі арбітраж.

Нямецкі канцэрн Uniper падаў пазоў у Стакгольмскі арбітраж супраць "Газпрам экспарту", паведаміла прэс-служба кампаніі ў сераду.

Uniper, у мінулым найбуйнейшы пакупнік расейскага газу ў Нямеччыне і адзін з інвестараў праекта "Паўночны струмень – 2", патрабуе кампенсацыі стратаў праз рэзкае скарачэнне паставак расейскага газу, якое пачалося ў чэрвені і паскорылася восенню.

Каб пакрыць абавязальніцтвы перад кліентамі, кампанія была вымушаная набываць газ на спотавым рынку, дзе каціроўкі шматкроць вышэйшыя за кантрактныя кошты "Газпрама". Гэта прывяло да дадатковых выдаткаў на 11,6 млрд еўраў, канстатуе кампанія ў рэлізе, падкрэсліваючы, што сума не канчатковая і будзе павялічвацца да канца 2024 года.

"Мы патрабуем кампенсацыі нашых істотных фінансавых стратаў", – заявіў кіраўнік Uniper Клаўс-Дытэр Маўбах. Ён дадаў, што кампанія "не нясе адказнасці" за тое, што "Газпрам" адмовіўся пастаўляць абумоўленыя кантрактамі аб'ёмы газу, а дамагчыся ад яго кампенсацыі – гэта "абавязак перад акцыянерамі, супрацоўнікамі і падаткаплацельнікамі".

Урад Нямеччыны ўжо вылучыў 29 млрд еўраў, каб выратаваць ад краху кампанію, чыстая страта якой дасягнула 3,2 млрд еўраў за студзень – верасень і стала найбуйнейшай у яе гісторыі.

У агульнай колькасці Uniper могуць спатрэбіцца ўліванні на 60 млрд еўраў, калі кошты газу застаюцца высокімі, расказалі Bloomberg крыніцы, знаёмыя з ацэнкамі нямецкіх чыноўнікаў.

У верасні ўрад ФРГ дамовілася пра выкуп 78% у фінскай Fortum. У выніку канцэрн дэ-факта быў нацыяналізаваны: цяпер Uniper на 90% належыць Нямеччыне.