У Польшчы пачаліся найбуйнейшыя вайсковыя вучэнні Вышаградскай групы
9- 4.11.2022, 21:25
- 7,742
Вучэнні будуць праходзіць удзень і ўночы.
На палігоне Новай Дэмбе Падкарпацкага ваяводства Польшчы сёння, 4 лістапада, пачаліся найбуйнейшыя вайсковыя вучэнні краін Вышаградскай групы (Польшча, Чэхія, Славаччына і Вугоршчына) пад назвай Puma-2022.
Пра гэта паведамляе PAP.
Сцэнар вучэнняў, якія будуць праходзіць да 9 лістапада, улічвае аспекты расейскай поўнамаштабнай агрэсіі супраць Украіны. У вайсковых манеўрах удзельнічаюць блізу дзве тысячы вайскоўцаў і пад 300 адзінак вайсковай тэхнікі. У вучэннях таксама бяруць удзел войскі з Вялікай Брытаніі ды ЗША.
Мэта вучэнняў - павышэнне зладжанасці хаўрусніцкіх войскаў, а таксама правяранне здольнасці планаваць, арганізоўваць і праводзіць тактычныя аперацыі ва ўзаемадзеянні з хаўруснікамі.
Вучэнні будуць праходзіць удзень і ўночы. У вучэннях бяруць удзел збольшага падраздзяленні танкавых і механізаваных войскаў, а таксама артылерысты, сапёры, хімікі і выведнікі. Паралельна з Puma-2022 будуць праходзіць таксама камандна-штабныя вучэнні System-22, Gepard-22 і San-22.