Як беларусам падаць дакументы на польскую візу без пасярэднікаў

У нашай краіне цяпер дзейнічае восем візавых цэнтраў.

З 28 лістапада партал VFS Global, які з'яўляецца партнёрам пасольства Рэспублікі Польшча ў Беларусі, увёў абавязковую верыфікацыю для тых, хто хоча падаць дакументы на атрыманне шэнгенскай і нацыянальнай візы, піша myfin.by.

Гэта азначае, што зарэзэрваваць дату візіту ў візавы цэнтр цяпер можна толькі на канкрэтнага чалавека, які прайшоў ідэнтыфікацыю праз Міжбанкаўскую сістэму ідэнтыфікацыі (МСІ). Верыфікацыя ўскладняе задачу шматлікім пасярэднікам, кошт паслуг па рэзерваванні месцаў у якіх яшчэ нядаўна даходзіў да 1100 беларускіх рублёў на чалавека.

Ініцыятарам увядзення такой верыфікацыі выступіў беларус Яўген Андрэйчык, які больш за пяць гадоў жыве ў Польшчы і дапамагае суайчыннікам адаптавацца ў гэтай краіне.

- Праблемы з запісам на падачу дакументаў у візавыя цэнтры ў беларусаў пачаліся яшчэ падчас пандэміі COVID-19. Але за апошні год сітуацыя стала крытычнай - «злавіць» дату падачы дакументаў у візавы цэнтр было практычна нерэальна. Я ўбачыў, як можна развязаць гэтую праблему, і звярнуўся ў МЗС Польшчы.

Яўген распавёў, што прапанаваў крыху дапрацаваць сістэму рэгістрацыі на партале VFS Global і ўвесці верыфікацыю для тых, хто хоча падаць дакументы для афармлення візы.

- З МЗС Польшчы даволі хутка прыйшоў адказ. Міністэрства выказала заклапочанасць гэтай праблемай і паабяцала ўжыць захады.

Са слоў Яўгена, з моманту звароту ў МЗС да ўвядзення новых правілаў верыфікацыі прайшло блізу трох месяцаў.

- Я не думаю, што гэта асабіста мая заслуга, бо з такой праблемай у МЗС напэўна звярталіся многія беларусы. І я рады, што цяпер людзям не трэба плаціць нейкія шалёныя грошы для таго, каб проста запісацца на падачу дакументаў у візавы цэнтр.

Журналісты пратэставалі новую сістэму верыфікацыі і ўпэўніліся, што вольныя даты для падачы дакументаў ёсць. Напрыклад, у візавым цэнтры Менска найбліжэйшая дата падачы дакументаў - 21 снежня.

Усяго ў Беларусі дзейнічае 8 візавых цэнтраў, размешчаных у сталіцы, абласных гарадах і некаторых райцэнтрах - Пінску, Баранавічах, Лідзе.