Стаўбцоўскі раён застанецца без адвакатаў

Адзіныя тры, якія там ёсць, не прайшлі атэстацыю.

У Стаўбцоўскім раёне трое адвакатаў не прайшлі атэстацыю - гэта ўсе спецыялісты, якія там ёсць, паведамляе праваабарончы цэнтр «Вясна».

Паводле звестак праваабаронцаў, увесь Стаўбцоўскі раён з насельніцтвам больш за 40 тысяч чалавек застаўся без адвакатаў, пасля таго як кваліфікацыйная камісія Міністэрства юстыцыі не атэставала адзіных траіх спецыялістаў, што там ёсць.

Сёння таксама стала вядома, што пазачарговую атэстацыю Міністэрства юстыцыі не прайшлі яшчэ двое адвакатаў - Уладзімір Пыльчанка і Віктар Мацкевіч.

Пыльчанка — адвакат Марыі Калеснікавай, якая цяпер знаходзіцца ў шпіталі пасля аперацыі, а таксама Эдуарда Бабарыкі, Ірыны Слаўнікавай, Кацярыны Бахвалавай, Лявона Халатрана ды іншых.

Віктар Мацкевіч прадстаўляе інтарэсы Сяргея Ціханоўскага, Ігара Аліневіча, Акіхіры Гаеўскага-Ханады, Яўгена Юшкевіча, Віктара Бабарыкі, Алеся Бяляцкага.

Нагадаем, у Беларусі больш за 70 адвакатаў пазбаўленыя ліцэнзій, блізу 250 чалавек самі наважылі сысці з адвакатуры пасля падзей 2020 года, падлічылі праваабаронцы. Шэсць адвакатаў знаходзяцца за кратамі. Яны прызнаныя палітычнымі вязнямі.