Былога прапагандыста БТ прысудзілі да 4-х гадоў калоніі

За краты таксама адправілі ягоную жонку і яшчэ двух фігурантаў справы.

Суд вынес прысуд былому журналісту Белтэлерадыёкампаніі, ягонай жонцы і яшчэ двум фігурантам справы. Іх прызналі вінаватымі ў дыскрэдытацыі Беларусі і ўдзеле ў пратэстах. Пра гэта паведамляе праваабарончы цэнтр «Вясна».

Суд прызначыў пакаранне:

Экс-супрацоўніку БТ і пазаштатнаму карэспандэнту казахстанскага тэлекала «Хабар 24» Дзмітрыю Лукшу - 4 гады калоніі агульнага рэжыму і штраф 500 базавых адзінак (16 000 рублёў);

Ягонай жонцы Паліне Палавінцы — 2,5 гады калоніі агульнага рэжыму і штраф 100 базавых адзінак (3 200 рублёў);

Аператару Канстанціну Міканораву — 3 гады «хатняй хіміі» і штраф 100 базавых адзінак (3 200 рублёў);

Дзянісу Яроўскаму (знаёмы сем'і, абвінавачваўся паводле ч. 1 арт. 342 КК — арганізацыя і падрыхтоўка дзеянняў, якія груба парушаюць грамадскі парадак) — 1,5 гады калоніі агульнага рэжыму і штраф 100 базавых адзінак (3200 рублёў).

Дзмітрый Лукша доўга працаваў у «Белтэлерадыёкампаніі», быў вядучым праграмы «Зона Х». Аднак некалькі гадоў таму ён звольніўся, нейкі час працаваў для RTVI, а як мінімум з 2018 года быў пазаштатным карэспандэнтам казахстанскага тэлеканала «Хабар 24» у Беларусі.