«Накрывалі з «Градаў» свае ж, выбраўся толькі я»

Расейскі «адмоўнік» распавёў, як патрапіў у склеп у «ДНР».

Расейскі акупант запатрабаваў прыцягнуць афіцэраў УС РФ да крымінальнай адказнасці за перавышэнне імі службовых паўнамоцтваў. З ягоных слоў, яны выкралі яго з таварышамі па службе і незаконна ўтрымлівалі ў падвале «ДНР».

Прычынай нібыта стала адмова мабілізаваных ваяваць у акопах на тэрыторыі Украіны, дзе іх накрывалі «свае ж «Грады». Аб гэтым піша Telegram-канал «Можам растлумачыць», публікуючы фота заявы вайскоўца следчаму камітэту РФ.

«Мы траплялі пад агонь уласнай артылерыі. Свае ж «Грады» працавалі па сваіх акопах», - распавёў вызвалены са склепа «ДНР» захопнік-«адмоўнік» Міхаіл Носаў.

Ён кажа, што яго таварышы па службе яшчэ застаюцца ў падвалах акупантаў. Таксама прызнаўся, што ваяваў супраць УСУ, знаходзячыся на пазіцыях побач з сялом Старавераўкай Харкаўскай вобласці.

«Нас завозілі на два дні ў акопы сачыць, каб вораг не падышоў. Па нас увесь час вяліся мінамётныя абстрэлы, а з квадракоптараў гранаты скідалі. У нас былі аўтаматы, вінтоўкі, кулямёты і ўсё», – успомніў Носаў.

Ён сцвярджае, што пасля першага дня ў акопе адмовіўся ваяваць. Акупант паскардзіўся, што многія расейскія вайскоўцы загінулі, у асноўным ад мінамётных абстрэлаў, прычым з боку сваіх жа. Але камандзіры патлумачылі непадрыхтаваным да бою жаўнерам, што «Град» – зброя не высокадакладная, таму роскід набояў вялікі і «калі закрануць сваіх, гэта нармальна».

Адзначаецца, што 12 кастрычніка ён і яшчэ 13 саслужыўцаў напісалі рапарт аб адмове ад службы ў шэрагах войска РФ, а ўжо 16 кастрычніка іх «адвезлі ў падвал каля вёскі Фёдараўкі». Маўляў, першыя тры дні іх не кармілі, удзень «адмоўнікі» капалі акопы, а потым іх нібы замыкалі ў халодным падвале, і агулам утрымлівалі так больш за тры тыдні.

Імёны некаторых таварышаў па службе, якія засталіся там, Носаў запомніў: Міхаіл Катоўшчыкоў, Аляксей Калінін, Віталь Дарнікаў, Яўген Масюцін, Аляксей Шаўцоў, Уладзіслаў Басенка.

«Увесь час кагосьці прывозілі, кагосьці адвозілі. Усяго ў падвале было 25 чалавек. Наколькі ведаю, з яго выбраўся толькі я», - выказаўся ён.

Акупанта выпусцілі 13 лістапада і адвезлі ў Растоўскую вобласць РФ, каб ён патрапіў у шпіталь. Ужо з клінікі той звярнуўся да адваката і падаў у СКР заяву аб учыненых у дачыненні да яго злачынствах. СМІ дадало, што цяпер «адмоўнік» знаходзіцца ў санчастцы Сямёнаўскага палка ў Маскве і праходзіць лячэнне.