Войскі Пуціна ў Беларусі: Што адбываецца вакол Сувалкскага калідора?
7- 18.02.2022, 21:39
- 13,660
Незалежна ад таго, як скончыцца крызіс вакол Украіны, пагроза ўсходняму флангу NATO застанецца.
Лукашэнка не гатовы паведаміць, калі прыкладна 30 тыс. расейскіх войскаў, якія знаходзяцца цяпер у Беларусі, пакінуць краіну, піша для atlanticcouncil.org (пераклад – nv.ua) пазаштатны старэйшы навуковы супрацоўнік Еўразійскага цэнтра Anlantic Council, дацэнт Тэхаскага ўніверсітэта ў Арлінгтане Уітмар.
На фоне найбуйнейшага з часоў халоднай вайны разгортвання войскаў Расеі ў Беларусі, якое ўключае тактычныя ракеты Іскандэр, зенітныя ракетныя сістэмы С-400 і знішчальнікі СУ-35, беларускі дыктатар сказаў, што сустрэнецца з Пуціным, каб вызначыць, «калі, на якіх умовах і з якім графікам» войскі будуць адводзіцца. «Гэта будзе наша пастанова. Гэта наша тэрыторыя», – падкрэсліў ён.
Разгортванне расейскіх войскаў у Беларусі ажыццяўляецца нібыта для вайсковых вучэнняў, якія прадоўжацца да 20 лютага. Але войскі гэтыя размяшчаюцца пагрозліва блізка да беларуска-ўкраінскай мяжы ў той час, калі Расея прадаўжае канцэнтраваць больш за 100 тыс. жаўнераў ля ўласнай мяжы з Украінай і на анэксаваным Крымскім паўвостраве. Тым часам расейскія ВМС праводзяць баявыя вучэнні ў Чорным моры ля ўзбярэжжа Украіны.
У інтэрв'ю Foreign Policy міністр замежных справаў Польшчы Збігнеў Рау заявіў, што характар разгортвання ў Беларусі мяркуе, што расейскія войскі могуць не сысці ніколі. «Нарошчванне ваеннай моцы ў Беларусі здаецца нечым больш сталым, на жаль, і гэта выклікае ў нас вялікую заклапочанасць», – сказаў ён.
У гэтым разгортванні расейскіх войскаў найбольшы непакой, вядома, выклікае перспектыва іхняга выкарыстання ў рамках поўнамаштабнага расейскага ўварвання ва Украіну. З Беларусі гэтыя войскі могуць дасягнуць Кіева прыкладна за дзве гадзіны.
Аднак не менш трывожныя і доўгатэрміновыя наступствы мілітарызацыі Беларусі Пуціным. Яны ўяўляюць з сябе найзначнейшую змену ў разліках бяспекі ва Усходняй Еўропе з часу заканчэння халоднай войны. Нават калі б Пуцін не стаў правакаваць і ствараць крызіс вакол Украіны, гэта ўсё роўна нічога не мяняе.
Нядзіўна, што краіны на ўсходнім флангу NATO, які мяжуе з Расеяй і Беларуссю, цяпер паднімаюць трывогу.
Балтыйскія дзяржавы, сярод іншага, занепакоеныя тым, што сталая прысутнасць расейскіх войскаў у Беларусі спрыяе пашырэнню магчымасцяў Масквы да ізаляцыі Сувалкскага калідора. Гэта сухапутны адрэзак даўжынёй блізу 100 кіламетраў, які мог бы гіпатэтычна злучыць тэрыторыю Беларусі з анклавам Расеі – Калінінградскай вобласцю. Цяпер па гэтай тэрыторыі праходзіць мяжа Польшчы з Літвой.
Калі б Расея змагла захапіць і ізаляваць гэты стратэгічны адрэзак еўрапейскай зямлі, Эстонія, Латвія і Літва сталі б адрэзанымі ад астатняй часткі NATO. Тры балтыйскія дзяржавы не змогуць атрымаць падмацавання з сушы і будуць уразлівыя перад агрэсіяй з боку Масквы.
У каментары для Washington Post канцлер Міністэрства абароны Эстоніі Кусці Салм сказаў без хітрыкаў: «Цяпер мы паўвостраў. А можам стаць востравам».
Акрамя таго, гаворачы пра знешнюю палітыку, Крысціян Мяе, кіраўнік Дэпартамента NATO і Еўрапейскага Звязу Міністэрства Эстоніі назваў расейскае нарошчванне ў Беларусі «паваротным момантам», дадаўшы, што ў мінулым «Беларусь заўсёды супраціўлялася сталаму размяшчэнню расейскіх войскаў. Тое, што мы цяпер бачым, гэта стратэгічныя магчымасці, у дадатак да звычайных войскаў, якія яшчэ больш зменяць разлікі на карысць Расеі».
Літва і Польшча, якія мяжуюць з Беларуссю на Захадзе, заклікаюць ЗША і NATO разгарнуць больш войскаў і ваеннай тэхнікі для ўразлівых усходніх чальцоў альянсу.
Пасля сустрэчы з прэм'ер-міністрам Вялікай Брытаніі Борысам Джонсанам, прэм'ер-міністарка Літвы Інгрыда Шыманітэ сказала, што яе краіна мае патрэбу ў «пашырэнні прысутнасці партнёраў NATO ў Літве». І міністр замежных справаў Польшчы Рау сказаў дзяржсакратару ЗША Энтані Блінкену, што стрымліванне неабходна ўзмацніць: «Перад абліччам патэнцыйнай пагрозы, якая расце па другі бок нашай мяжы, неабходная большая прысутнасць войскаў NATO».
Прыкладна 12 тыс. вайскоўцаў NATO і ЗША цяпер размешчаныя ў краінах Балтыі, Польшчы і Румыніі на ратацыйнай аснове. 24 студзеня прэзідэнт ЗША Джо Байдэн прывёў 8500 амерыканскіх вайскоўцаў у «высокую баявую гатоўнасць» для разгортвання ва Усходняй Еўропе ў выпадку неабходнасці. А 2 лютага Пентагон перакінуў 2 тыс. вайскоўцаў у Еўропу, у асноўным у Польшчу, і яшчэ тысячу вайскоўцаў з Нямеччыны ў Румынію.
Усе гэтыя крокі вітаюцца. Але беручы да ўвагі, як моцна расейская мілітарызацыя Беларусі мяняе сітуацыю ў плане бяспекі для дзяржаваў NATO, якія знаходзяцца на яго ўсходнім флангу, гэтых крокаў недастаткова. ЗША і NATO павінны разгледзець пытанне пра вылучэнне Балтыі і Польшчы таго, што яны прасілі цягам многіх гадоў – сталых базаў ЗША і NATO.
У цяперашні момант уся ўвага прыкаваная да таго, як Расея бразгае зброяй уздоўж украінскай мяжы. Але незалежна ад таго, як скончыцца створаны Пуціным крызіс вакол Украіны, пагроза ўсходняму флангу NATO застанецца.