У Кітаі знайшлі гіганцкі правал

Там могуць хавацца невядомыя навуцы віды.

Група кітайскіх навукоўцаў выявіла новы гіганцкі правал з лесам на дне. Там ёсць тры ўваходы ў пячору, а таксама старажытныя дрэвы вышынёй 40 м.

Паводле інфармацыі агенцтва Сіньхуа, глыбіня правалу складае 192 м. Гэтага дастаткова, каб «праглынуць» арку ў Сэнт-Луісе, таксама вядомую як «Брама на Захад». Група спелеолагаў спусцілася ў правал і выявіла, што ў прорве ёсць тры ўваходы ў пячору, а таксама старажытныя дрэвы вышынёй 40 м.

У Паўднёвым Кітаі шмат карставых ландшафтаў, якія фармуюцца ў асноўным у выніку растварэння карэнных парод. Дажджавая вада са слабай кіслотнасцю паглынае вуглякіслы газ, праходзячы праз глебу, і становіцца яшчэ кіслейшай. Затым яна цячэ праз расколіны ў скале, павольна пашыраючы іх, ствараючы тунэлі і пустэчы. З часам, калі камера пячоры стане досыць вялікай, столь можа паступова абрынуцца, адкрываючы велізарныя правалы. Пры гэтым уваходы ў пячоры могуць быць вельмі маленькімі.

Новую варонку знайшлі ў Гуансі-Чжуанскім аўтаномным раёне, недалёка ад вёскі Пін'э ў павеце Лее. Гуансі вядомы сваімі карставымі ўтварэннямі, якія вар'ююцца ад варонак да каменных слупоў і натуральных мастоў. Менавіта праз гэтыя асаблівасці рэгіён унесены ў спіс Сусветнай спадчыны ЮНЕСКА.

Унутраная частка варонкі складае 306 м у даўжыню і 150 м у шырыню. У Кітаі такія вялізныя варонкі называюцца «цянькенг», або «райская яма». І варонкі сапраўды здаюцца іншым светам. Чэнь Лісінь, які ўзначальваў групу экспедыцыі ў пячору, паведаміў агенцтву Сіньхуа, што густы падлесак на дне варонкі дасягае вышыні плячэй чалавека.

Са слоў Джорджа Вені, выканаўчага дырэктара Нацыянальнага даследчага інстытута NCKRI ў ЗША, карставыя пячоры і варонкі могуць стаць аазісам для жыцця. «Я не здзіўлюся, калі даведаюся, што ў гэтых пячорах выяўленыя віды, аб якіх навука дагэтуль не паведамляла», – рэзюмуе ён.

Новае адкрыццё павялічыла колькасць варонак у акрузе Лее да 30. Тыя ж даследчыкі раней выявілі дзясяткі варонак у правінцыі Шэньсі на паўночным захадзе Кітая і групу ўзаемазвязаных варонак у Гуансі, паведамляе China Daily.