Байцы тэрытарыяльнай абароны знішчылі на Харкаўшчыне расейскі танк Т-90М, які расстраляў калону з цывільным насельніцтвам
3- 20.05.2022, 10:43
- 12,444
Карма нагнала акупантаў у выглядзе набою са шведскага гранатамёта «Карл Густаў».
У Старым Салтове Харкаўскай вобласці мясцовая тэрытарыяльная абарона знішчыла найноўшы расейскі танк Т-90М - ад траплення ў яго з гранатамёта варожая тэхніка даслоўна ператварылася ў металалом.
Танк быў знішчаны яшчэ раней - сам населены пункт украінскія абаронцы вызвалілі блізу двух тыдняў таму. Цяпер украінскія вайскоўцы дэталёва знялі знішчаную тэхніку і распавялі, як удалося ліквідаваць яе разам з акупантамі, якія там знаходзіліся.
Адпаведнае відэа апублікавала ў Facebook Тэрытарыяльная абарона УСУ.
Аўтар відэа распавёў, што кіравалі гэтым танкам удзельнікі танкавага біятлону - спаборніцтваў, падчас якіх танкавыя экіпажы мераюцца майстэрствам кіравання тэхнікай і трапнасцю стральбы з яе. Аднак такія ўменні не дапамаглі акупантам выжыць, кажа аўтарка відэа.
Таксама зазначаецца, што менавіта гэты экіпаж раней расстраляў з танка калону з мірнымі жыхарамі. Пад варожы абстрэл патрапілі 5-6 аўтамабіляў з цывільнымі і больш за 20 чалавек загінулі.
Абаронцы Украіны падбілі расейскі танк са шведскага гранатамёта «Карл Густаў», які Украіне перадала Канада.
Танк Т-90
Т-90 «Уладзімір» - гэта сучасны расейскі асноўны баявы танк. Яго прынялі на ўзбраенне ў РФ у 1992 годзе.
Паводле звестак з адкрытых крыніц, на 2010 год цана аднаго такога расейскага танка складала 70 мільёнаў рублёў, аднак у наступныя гады называлася лічба 118 мільёнаў рублёў.