З Нямеччыны дэпартуюць шасцярых беларусаў

Нелегальна працавалі на будоўлі.

Нямецкія праваахоўнікі знайшлі ў горадзе Існі на поўдні Нямеччыны шасцярых працоўных з Беларусі, якія неафіцыйна працавалі на будоўлі, паведамляе Служба нямецкай мытні ў барацьбе з нелегаламі.

Нелегальных працоўных выявілі следчыя мытні Фрыдрыхсхафена пры правядзенні праверкі на будоўлі аб'екта ў Існі на мінулым тыдні. У беларусаў былі польскія візы, аднак гэта не давала ім права на працаўладкаванне ў Нямеччыне.

Служба нямецкай мытні ў барацьбе з нелегаламі пачала расследаванне ў дачыненні да польскага субпадрадчыка. Беларусы на пастанову іміграцыйных уладаў будуць высланыя з забаронай на ўезд у Нямеччыну.