Археолагі раскапалі ў Іране Вялікі храм агню

Знойдзеныя рэліквіі могуць праліць новае святло на жыццё ў эпоху Сасанідаў.

У Іране археолагі знайшлі раней невядомыя творы мастацтва эпохі Сасанідаў. Навукоўцы мяркуюць, што гэтыя рэліквіі ўпрыгожвалі Вялікі храм агню.

Як паведамляе Tehran Times, мноства цудоўных, са слоў археолагаў, твораў мастацтва было знойдзена пры правядзенні раскопак на паўночным усходзе Ірана. Работы праводзіліся ў даліне недалёка ад вёскі Робат-э-Сэфід. Выданне адзначае, што гэта стратэгічна важны геаграфічны пункт, бо праз яго стагоддзямі праходзіла галоўная караванная дарога з поўначы на поўдзень.

Знойдзеныя рэліквіі могуць праліць новае святло на жыццё імперыі ў эпоху Сасанідаў (224-651 гг. н.э.). Зрэшты, археолагі выявілі цудоўную калекцыю ляпніны, упрыгожанай геаметрычнымі, расліннымі і чалавечымі матывамі. Навукоўцы мяркуюць, што гэта маглі быць элементы ўпрыгожвання сакральнага комплексу.

«Раскопкі гэтага сезона выявілі пляцоўкі разбуранага архітэктурнага комплексу, які быў Вялікім храмам агню ў парфянскую і сасанідскую эпохі, – кажа археолаг Мейсам Лабаф-Ханікі. – Храм агню складаўся з чатырохарачнага цаглянага збору і гіпастыльнай залы».

Ён меў традыцыйную форму Чахар-Так - гэта архітэктурная форма, пры якой усе чатыры сцяны квадратнага пакоя маюць арачныя скляпенні. Са слоў экспэртаў, гэтая архітэктурная форма менавіта ў эпоху Сасанідаў атрымала шырокае распаўсюджванне і стала тыповай для ўсёй рэлігійнай архітэктуры.

Навукоўцы звязваюць гэтую тэндэнцыю з узмацненнем пазіцый зараастрызму - у часы праўлення Сасанідаў гэта была асноўная рэлігія. Дарэчы, некаторыя элементы названай традыцыі былі захаваныя і ў наступную ісламскую эпоху. Форма Чахар-Так стала выкарыстоўвацца ў рэлігійных і святых будынках, такіх як мячэці і грабніцы.

Са слоў Мейсама Лабафа-Ханікі, падчас раскопак таксама было ўстаноўлена, што кожная з калон галоўнай залы храма агню была ўпрыгожаная капітэлямі з вытанчанай ляпнінай. Акрамя таго, унутры будынка былі знойдзеныя старажытныя пячаткі. Гэта сведчыць аб тым, што ў храме вялася не толькі рэлігійная, але і адміністрацыйная дзейнасць.