У Беларусі могуць пачаць выкарыстоўваць кубінскія вакцыны супраць COVID-19
8- 6.06.2022, 19:54
- 4,410
Гэтая вакцына яшчэ не ўхваленая САЗ.
Дырэктар менскага Цэнтра экспертызаў і выпрабаванняў у ахове здароўя Дзмітрый Грынько ў панядзелак сустрэўся з амбасадарам Рэспублікі Куба ў Беларусі Сант'яга Перэсам Бенітэсам. Асноўнай тэмай перамоваў было пытанне пра перспектывы ўжывання ў Беларусі вакцынаў ад каранавірусу вытворчасці Кубы, паведамляе прэс-служба Міністэрства аховы здароўя.
Гаворка ідзе пра вакцыны і Soberana Plus (бустар), якія распрацаваныя Інстытутам вакцынаў Фінлея і вырабляюцца прадпрыемствам BIOCEN.
Грынько і Бенітэс таксама абмяркоўвалі супрацоўніцтва ў сферы абарачэння лекаў і медвырабаў, магчымасць лакалізацыі фармвытворчасцяў.
Вакцыны "Саберана" (ад гішпанскага "суверэнная") на Кубе дазволеныя да ўжывання ў дарослых і дзяцей з трох гадоў (праводзіліся клінічныя выпрабаванні з удзелам 318 дзяцей). Таксама вакцына дазволеная ў Венесуэле, Нікарагуа і Іране (там яна вырабляецца пад назвай PastoCoVac). На трэцяй фазе клінічных выпрабаванняў у Іране вакцына, пры ўмове ўвядзення дзвюх дозаў і бустара, паказала 67 адсоткаў эфектыўнасці супраць сімптомаў COVID-19 і 96,5 адсотка эфектыўнасці супраць шпіталізацыі і цяжкай формы хваробы. Гэтая вакцына яшчэ не ўхваленая САЗ – зрэшты, як і расейскі «Спадарожнік V».