Камандаванне Паветраных сілаў Украіны расказала, што было знішчана на расейскай авіябазе ў Крыме
3- 10.08.2022, 10:57
- 16,530
Авіябазу «Сакі» войска РФ выкарыстоўвала для навучання карабельнай авіяцыі.
У выніку ўчорашняга ўдару па авіябазе «Сакі» ў часова акупаваным Крыме, мяркуючы з выбухаў, быў падбіты склад авіяцыйнага ўзбраення, паколькі адбылася сур'ёзная дэтанацыя.
Пра гэта прэс-сакратар Паветраных сілаў Украіны Юры Ігнат расказаў у эфіры агульнанацыянальнага тэлемарафону, паведамляе «Ліга.нет».
«Пра выбух, які мы назіралі ў відэаматэрыялах, зразумела, што падбіты склад авіяцыйнага ўзбраення. Таму што была сур'ёзная дэтанацыя – значыць, склад такі падбіты... Любы аэрадром, выведзены з ладу, – гэта вельмі добра. А яшчэ, калі дадаткова там знішчана з дзясятак самалётаў – гэта будзе ўвогуле сапраўдная невялікая перамога», – сказаў ён.
Ігнат паведаміў, што на гэтым аэрадроме ў Навафёдараўцы былі размешчаныя расейскія самалёты Су-30М, Су-24, Іл-76 і іншыя. Авіябазу «Сакі» войска РФ выкарыстоўвала для навучання карабельнай авіяцыі высадцы на палубу карабля, аднак, як нагадаў Ігнат, авіяносца ў расейцаў няма – адзіны расейскі авіяносец, флагман Ваенна-марскога флоту РФ і Паўночнага флоту «Адмірал Кузняцоў» «задыміў ужо ўсе моры трубой».
Спікер Паветраных сілаў падкрэсліў, што любы аэрадром, які знаходзіцца на падлёце да Украіны, з'яўляецца небяспечным, і з гэтага аэрадрома штодня ўзляталі самалёты акупантаў. Яны ўжо не далятаюць да Змяінага, але кругласутачна патрулююць у Чорным моры.