Галоўныя версіі атакі на аэрадром пад Гомелем

Частка дывізіёна расейскіх комплексаў С-400 «Трыюмф» выведзеная са строю.

Блізу паўночы 11 жніўня на аэрадроме «Зябраўка» ў Гомельскай вобласці Беларусі раздаліся выбухі. Паводле звестак уладаў Украіны, там базаваліся расейскія войскі ўварвання, адтуль абстрэльвалі ўкраінскую тэрыторыю, а ў апошні час РФ цалкам атрымала базу ў сваё распараджэнне.

«Новое время» сабрала галоўныя версіі пра напад на аэрадром пад Гомелем.

Восем яркіх выбліскаў

Першым пра здарэнне ў «Зябраўцы» паведаміў гомельскі тэлеграм-канал «Флагшток». «З 00:25 да 00:32 былі чуваць выбухі, адчувалася [ударная] хваля, пару разоў праз суцэльную воблачнасць [былі бачныя] светлавыя пробліскі. Кірунак – зябраўскі аэрадром», – расказаў падпісчык канала.

У сацсетках падлічылі, што ўспышак было восем. Відавочца зняў адзін з выбухаў.

Нагадаем, у пачатку жніўня прыляцелі як мінімум 4 ваенна-транспартныя самалёты ПКС РФ у гомельскі аэрапорт. «Беларускі Гаюн» зафіксаваў перавозку ракетаў для пускавых комплексаў С300/С400, а Міністэрства абароны РБ абвясціла пра правядзенне «аператыўна-тактычных вучэнняў» войскаў ВПС і СПА з баявымі стрэльбамі» з 9 да 11 жніўня, не называючы месца стрэльбаў. Таксама ў пачатку жніўня змянілася месцазнаходжання ракетных комплексаў.

Галоўныя версіі

У апошнія дні расейскія акупанты актыўна перакідвалі ў Беларусь ракеты для зенітна-ракетных комплексаў С-300 і С-400, сярод іншага, іх везлі на аэрадром у «Зябраўцы», інфармаваў праект «Беларускі Гаюн».

Зыходзячы з наяўных да гэтай гадзіны звестак, «Беларускі Гаюн» вылучыў чатыры найбольш рэальныя версіі начных выбухаў.

1. Праводзіліся начныя трэніроўкі ВПС і СПА са стральбой. Вучэнні сапраўды планаваліся беларускай мінабаронай, але іх дата і месца правядзення не ўказваліся, акрамя таго, стрэльбы не праводзяць так блізка ад населеных пунктаў.

2. Па аэрадроме маглі быць нанесеныя ўдары з мэтай знішчэння комплексаў ЗРК/ЗРПК, якія там дыслакуюцца.

3. Адпрацоўвалася збіванне БПЛА пры дапамозе СПА (але зноў жа – Мінабароны РБ пра гэта маўчыць).

4. Пампаж авіярухавіка – афіцыйная прычына. Але ў «Зябраўцы» няма самалётаў, а гелікоптарны пампаж практычна не заўважны.

Анлайн-часопіс Defence Blog са спасылкай на крыніцу ў выведцы апублікаваў інфармацыю, што ўначы ў Зябраўцы выбухнуў расейскі радар кіравання агнём 92Н6. Падобныя РЛС сапраўды фіксаваліся на аэрадроме раней.

Маніторынгавая група «Беларускі Гаюн» паведамляе, што ў выніку выбухаў быў знішчаны танк Т-72 і блізу 10 снарадаў. Таксама выбухі маглі знішчыць расейскі радыёлакатар падсветкі і навядзення (РПН) 92Н6Е, які дапамагае зенітна-ракетным комплексам выяўляць цэлі і знішчаць іх.

Калі інфармацыя дакладная, то як мінімум частка з дывізіёна зенітна-ракетных комплексаў С-400 «Трыюмф», якія знаходзяцца на аэрадроме, цяпер з'яўляецца недзеяздольный, гаворыцца ў паведамленні маніторынгавай групы.

Таксама ёсць інфармацыя пра пацярпелых, але ўсё гэта патрабуе афіцыйнага пацверджання.

Частка жарту

Украінскія каментатары абмяжоўваюцца саркастычнымі рэплікамі датычна здарэння ў Беларусі. Так, дарадца міністра абароны Украіны Аляксей Капыцько заклікаў верыць, што выбухі былі планавымі. «На аэрадроме “Зябраўка” ў раёне Гомеля праходзяць раней неаднаразова анансаваныя пюрарам вучэнні СПА і ВПС. Любыя плескачы і да т. п. – выключна ў рамках гэтых вучэнняў», – напісаў ён.

Кастусь Машавец з групы Інфармацыйны супраціў іранізуе над заявамі Мінабароны РБ пра «кантрольны прабег» і адсутнасць пашкоджанняў. Паводле ягоных словаў, «непацярпелыя рэшткі ЗРК Панцыр-1С і пары ЗРК С-300 расцягвалі ўсю ноч».

Спікер Камандавання Паветраных сілаў ЗСУ Юры Ігнат у эфіры тэлеканала «Белсат» нагадаў пра беларускі партызанскі рух. «Мы ведаем, што яны надзвычай добрыя, разумныя і кемлівыя людзі, якія ўжо надзвычай добра дапамагаюць нашай дзяржаве, Узброеным сілам Украіны. І мы толькі дзякуем братэрскаму беларускаму народу, які дапаможа Украіне перамагчы акупантаў і выгнаць іх з нашай зямлі. І з вашай таксама», – адзначыў спікер. Тым не менш, дадаў ён, датычна сітуацыі ў «Зябраўцы» варта давяраць афіцыйнай інфармацыі Міністэрства абароны Украіны, як і ў выпадку са знішчэннем расейскіх самалётаў у крымскай Навафёдараўцы.

«Эпідэмію тэхнічных аварый на ваенных аэрадромах у Крыме і Беларусі расейскім вайскоўцам варта разглядаць як папярэджанне зверху: забудзьцеся пра Украіну, здыміце форму і сыходзьце», – напісаў у Twitter дарадца кіраўніка Офіса прэзідэнта Украіны Міхаіл Падаляк.

Расея з першых гадзінаў вайны абстрэльвае аб'екты ва Украіне з беларускай тэрыторыі, да гэтага часу не было вядома пра ўдары УСУ па Беларусі.

Другое жыццё аэрадрома

У Беларусі тры дзейныя авіябазы (Ліда, Мачулішчы, Баранавічы) і тры рэзервовыя (Бараўцы, Лунінец, Бабруйск). «Зябраўкі» (яна знаходзіцца за 20 км ад абласнога цэнтра Гомеля і прыкладна на такой самай адлегласці ад украінскай мяжы) у гэтым спісе няма.

У савецкія гады там стаяў 290-ы гвардзейскі выведвальны авіяполк далёкага дзеяння, які выкарыстоўваў звышгукавыя самалёты-выведнікі Ту-22Р. У 1994 годзе падраздзяленне было расфармаванае, самалёты выправілі ў Расею на ўтылізацыю. Аднак бетонная ўзлётная паласа засталася.

Ізноў пра «Зябраўку» ўспомнілі мінулай зімой. На здымках Maxar ад 10 лютага 2022 года відаць, што на закінутым аэрадроме знаходзяцца ваенныя гелікоптары, транспартныя сродкі, разгорнуты палявы шпіталь.

У траўні Генштаб УСУ сцвярджаў, што расейскія акупанты пачалі інжынерныя працы на аэрадроме «Зябраўка», які рыхтуюць да выкарыстання ў якасці вайсковай базы.

7 ліпеня намеснік кіраўніка Галоўнай аператыўнай управы Генеральнага штаба УСУ Аляксей Громаў заявіў, што беларускі дыктатар Аляксандр Лукашэнка перадаў «Зябраўку» пад поўны кантроль расейскіх войскаў. Туды быў перакінуты ракетны дывізіён аператыўна-тактычнага ракетнага комплексу Іскандэр-М і дывізіён С-400 Трыюмф УС РФ.

Ваенны аналітык Конрад Музыка апублікаваў у Twitter спадарожнікавыя здымкі, зробленыя кампаніяй Rochan Consulting. На фота можна ўбачыць дывізіён з 10 адзінак зенітна-ракетных комплексаў С-400 Трыюмф, дзве адзінкі зенітнага комплексу Панцыр-С1 на насыпах грунту, радары і радыёлакатары падсветкі і навядзення. Побач з ім пад маскавальнай сеткай размешчаны апаратны кантэйнер для аператараў.

Акрамя таго, на аэрадроме з'явіліся БМП і замаскаваныя танкі.

28 ліпеня «Беларускі Гаюн» паведаміў, што з «Зябраўкі» па Кіеўскай і Чарнігаўскай абласцях было запушчана не менш за 25 ракетаў. «Калі выказаць здагадку, што ўсе запускі былі з АТРК Іскандэр, то на аэрадроме павінна знаходзіцца не менш за шэсць такіх комплексаў», – выказалі здагадку аналітыкі.