Камандаванне Паветраных сілаў УСУ: Дакладна ўяўляем, колькі авіяцыйнай тэхнікі знаходзілася ў Зябраўцы
10- 13.08.2022, 10:26
- 24,024
Украінскія вайскоўцы ацанілі значэнне ўдару па авіябазе ў Беларусі.
У ноч на 11 жніўня ў Беларусі ў раёне ваеннага аэрадрома «Зябраўка» недалёка ад Гомеля былі чуваць выбухі і відаць бліскавіцы. Першым пра гэта паведаміў праект «Беларускі Гаюн», пазней інфармацыю пра інцыдэнт на тэрыторыі аэрадрома пацвердзілі ў Мінабароны Беларусі. Праўда, ва ўстанове заявілі, што на тэрыторыі аэрадрома загарэўся рухавік «адной з адзінак тэхнікі».
Што гэта за аэрадром, якую небяспеку ён уяўляў для Украіны і што вядома пра начны інцыдэнт на аэрадроме, у эфіры «Настоящего времени» расказаў прадстаўнік камандавання Паветраных сілаў УСУ Юры Ігнат.
– У вас ёсць інфармацыя – што ж на самай справе адбылося на аэрадроме «Зябраўка» пад Гомелем?
– Безумоўна, у нас няма інфармацыі. Мы валодаем той самай інфармацыяй, якую вы толькі што агучылі. Ёсць органы выведак – яны, напэўна, ведаюць больш. Паветраныя сілы могуць агучыць тое, што ўжо агучвалі пра стратэгічнае значэнне гэтага аэрадрома. Мы дакладна сабе ўяўляем, колькі авіяцыйнай тэхнікі там знаходзіцца. Мы ўвесь час бачым, адкуль узлятаюць з тэрыторыі Беларусі самалёты, іх актыўнасць у небе. І тыя зенітна-ракетныя комплексы, якія там размешчаныя, і комплексы «Іскандэр», якія вядуць агонь па тэрыторыі Украіны.
– А што за тэхніка: гэта штурмавікі, знішчальнікі, транспартныя самалёты Іл-76?
– Я скажу так, што ўсе без выключэння аэрадромы Беларусі выкарыстоўваюцца ваенна-касмічнымі сіламі акупантаў з першага дня вайны. Калі ёсць пэўнае стратэгічнае значэнне для іх выкарыстоўваць менавіта гэты аэрадром, то авіяцыя будзе перабазаваная туды. Гэтак сама, як Ту-22М3 былі перабазаваныя з поўдня на поўнач на аэрадром «Шайкоўка», гэтак сама і расейскія знішчальнікі могуць перамяшчацца з аднаго аэрадрома на іншы – для авіяцыі тут асаблівых праблемаў няма.
У асноўным на паўночных ад Украіны раёнах – гэта Рэспубліка Беларусь – і на ўсходзе краіны працуе знішчальная авіяцыя, якая стала патрулюе ў паветранай прасторы Расеі і Беларусі. На поўдні пасля выбухаў у Саках учора было адзначанае абсалютнае зніжэнне авіяцыйнай актыўнасці. Там увесь час ад бухты Севастопаля ў кірунку Змяінага і ніжэй у акваторыі Чорнага мора 24 на 7 мы назіралі расейскую авіяцыю. Учора ж Крым фактычна быў пусты. Вось такая сітуацыя.
– Вы гаворыце пра знішчальную актыўнасць у Зябраўцы. Гэта значыць, знішчальнікі – самалёты, якія павінны паражаць цэлі ў паветры. Гэта не бамбавікі, якія бамбуюць Украіну на зямлі?
– У асноўным знішчальнікі за час вайны дыслакаваліся на аэрадроме «Баранавічы». Зябраўка, як ужо казаў ваш спікер перада мной, – знаходзіцца непасрэдна блізка ад мяжы з Украінай. Як я ўжо казаў, яны могуць перадыслакаваць любую тэхніку. Таксама заўважаныя самалёты Іл-76, якія пастаўляюць узбраенне. Знішчальная авіяцыя Расеі, якая сёння ёсць на ўзбраенні ў краіны-агрэсаркі, – гэта шматмэтавыя знішчальнікі. Яны могуць наносіць удары як па паветраных цэлях, так і па наземных. Гэта значыць, несці крылатыя ракеты, якія могуць працаваць па зямлі. Таму цяпер авіяцыя надта не падзяляецца на знішчальную і бамбавікі. Бамбавікі, якія працуюць з аэрадрома «Шайкоўка», Ту-22М3, у іх ёсць свой тып узбраення – гэта ракеты Х-22, якія ўжываюць акупанты, а таксама стратэгічныя бамбавікі Ту-95 і Ту-160, якія працуюць амаль заўсёды з поўначы Каспійскага мора. Там ужо ў асноўным выкарыстоўваюцца ракеты Х-101 і Х-555.
– Ці ёсць звесткі ва ўкраінскай выведкі або ў Паветраных сілаў Украіны, што на аэрадроме «Зябраўка» адбываліся плескачы, выбухі, і калі гэтыя выбухі адбываліся, то чаму няма інфармацыі пра пашкоджаную тэхніку? Мы ўжо разабралі, якія самалёты былі пашкоджаныя ў Навафёдараўцы. Што здарылася ў Зябраўцы?
– На жаль, гэтае пытанне не да Паветраных сілаў. Ёсць у нас афіцыйныя рэсурсы – Міністэрства абароны – калі яны мяркуюць патрэбным, то выкажуць гэтую інфармацыю. Паветраныя сілы не маюць такой інфармацыі для абнародавання.
– Паводле вашай ацэнкі, тое, што выбухі адбываюцца дзень за днём – спачатку ў Навафёдараўцы, потым у Зябраўцы – гэта супадзенне?
– Магчыма, супадзенне. Мы ўжо чулі, што гавораць афіцыйныя асобы як з тэрыторыі Расеі, так і ў нас: загаранне, трэба быць вельмі асцярожнымі, не паліць на стаянках.
– Тым не менш Паветраныя сілы Украіны першымі апублікавалі колькасць пашкоджанай тэхнікі на аэрадроме ў Навафёдараўцы. Там была пазначаная лічба: Сакі – 9 самалётаў. Цяпер ёсць нейкая апошняя лічба пасля апублікавання спадарожнікавых здымкаў: колькі дакладна было пашкоджана самалётаў?
– Паветраныя сілы апублікавалі звесткі Генеральнага штаба, які вядзе штодня ўлік стратаў ворага. Там было падлічана 9 самалётаў. Пасля ўжо апублікаваных спадарожнікавых здымкаў можна гаварыць, што тэхнікі пашкоджана было больш: некаторая была знішчаная поўнасцю, а некаторая моцна абгарэла. Але мы ж разумеем, што частка тэхнікі магла быць прыбраная да таго, як былі зробленыя здымкі, таму тут трэба дачакацца ад крыніцаў выведзвестак, каб усё ж ведаць, колькі ж было знішчана. Але мы бачым на здымках, што значная частка тэхнікі знішчаная поўнасцю.
– Паводле вашых ацэнак, пасля таго, што здарылася, аэрадром «Сакі» прыдатны да далейшага выкарыстання?
– Думаю, так. Ніякіх глабальных разбурэнняў там не адбылося. Самае галоўнае на аэрадроме – гэта ўзлётна-пасадачная паласа, з якой могуць узлятаць і на якую могуць садзіцца знішчальнікі. Нават калі яна была б пашкоджаная, яе можна хутка адрамантаваць: мяняюцца аэрадромныя пліты. А тэхніку яны яшчэ падвязуць: як самалёты, гэтак і тэхнічнае абслугоўванне.
– Але тым не менш палётная актыўнасць на поўначы і на поўдні ад Украіны і ў акупаваным Крыме знізілася.