Reuters: Больш за палову баявых самалётаў Чарнаморскага флоту РФ выведзена са строю

Самалёты знішчылі выбухі на авіябазе «Сакі».

Выбухі на авіябазе «Сакі» ў анэксаваным Крыме вывелі са строю больш за палову баявых самалётаў марской авіяцыі Чарнаморскага флоту Расеі. Пра гэта паведамляе РБК-Украіна са спасылкай на Reuters.

Адзін з еўрапейскіх чыноўнікаў на ўмовах ананімнасці сказаў, што Украіна цяпер паслядоўна дамагаецца «кінэтычнага эфекту» глыбока ў тыле Расеі, што мае істотны ўплыў на матэрыяльна-тэхнічную падтрымку Расеі і псіхалагічнае ўздзеянне на расейскае кіраўніцтва.

- На нашы ацэнкі, выбухі на аэрадроме «Сакі» 9 жніўня вывелі са строю больш за палову баявых самалётаў марской авіяцыі Чарнаморскага флоту, - заявіў чыноўнік.

Чыноўнік дадаў, што агулам да гэтых выбухаў вайна знаходзілася ў моманце, блізкім да аперацыйнага застою.

З ягоных слоў, наземныя войскі ніводнага з бакоў не валодаюць дастатковай канцэнтраванай баявой моцай, каб пачаць эфектыўныя наступальныя дзеянні, якія нейкім чынам істотна паўплываюць на ход вайны.

Нагадаем, што ў першай палове жніўня ў Крыме адбылася серыя буйных узгаранняў на аэрадромах з дэтанацыяй боепрыпасаў.

16 жніўня ў Крыме зноў прагрымелі выбухі. На гэты раз іх зафіксавалі пад Джанкоем, а таксама на аэрадроме ў Гвардзейскім.