Пераважная большасць немцаў выступае за энэргетычную незалежнасць ад РФ

Апытанне.

Большасць жыхароў Нямеччыны - 71 адсотак - мяркуюць, што іх краіна павінна стаць энэргетычна незалежнай ад Расеі, і толькі 24 адсоткі прытрымліваюцца зваротнага меркавання. Такі адзін з вынікаў свежага сацыялагічнага апытання Deutschlandtrend, апублікаванага ў чацвер, 4 жніўня, перадае DW.

Больш за ўсё за энэрганезалежнасць ад РФ выступаюць прыхільнікі нямецкай партыі «зялёных» - 95 адсоткаў. Сярод выбарцаў СДП гэтая дзель складае 81 адсотак, у табары прыхільнікаў ХДУ/ХСУ - 75 адсоткаў, у прыхільнікаў СвДП - 73 адсоткі. Толькі ў выбарцаў за правапапулісцкую партыю «Альтэрнатыва для Нямеччыны» баланс іншы: толькі 32 адсоткі з іх лічыць дасягненне энэргетычнай незалежнасці ад Расеі правільнай мэтай, у той час як 64 адсоткі ўпэўненыя ў адваротным.

На захадзе Нямеччыны энэргетычную незалежнасць ад РФ падтрымлівае прыкметна большы адсотак насельніцтва, чым на ўсходзе краіны - 76 адсоткаў супраць 54. Але ў цэлым па краіне прыхільнікі гэтай меры ва ўпэўненай большасці, падкрэсліваюць сацыёлагі.

«Дастаткова» зброі для Украіны, «мала» санкцый супраць РФ

Згодна з вынікамі таго ж апытання, 39 адсоткаў немцаў мяркуюь апраўданым цяперашні аб'ём паставак зброі ФРГ Украіне. У чэрвені такое меркаванне сустракалася на 3 адсоткавыя пункты часцей. Пры гэтым 32 адсоткі апытаных (9 п.п, у параўнанні з чэрвенем) мяркуюць, што пастаўкі Кіеву ўзбраенняў зайшлі занадта далёка, і толькі 23 адсоткі (-6 п.п.) заявілі, што іх можна было б павялічыць.

Што тычыцца санкцый, уведзеных супраць РФ, то іх дагэтуль лічаць недастатковымі 37% немцаў, хоць гэтая дзель і зніжаецца - у чэрвені быў 41 адсотак. 34 адсоткі думаюць, што санкцый зараз столькі, колькі трэба (прыхільнікаў такога пункту гледжання стала менш на 3 п.п.), і 21 адсотак жыхароў ФРГ упэўнены, што санкцыйная вайна зайшла ўжо занадта далёка (+6 адсоткавых пунктаў).

Такім чынам, пасля пяці месяцаў вайны Расеі супраць Украіны немцы крыху астылі да ідэі падтрымкі апошняй. Аднак большасць з іх усё яшчэ застаюцца прыхільнымі ёй, адзначаюць сацыёлагі.

Сацыялагічнае даследаванне Deutschlandtrend праводзілася інстытутам Infratest dimap на замову грамадска-прававога тэлеканала ARD, з 1 да 3 жніўня. Усяго было апытана 1 313 чалавек, у тым ліку, 858 праз тэлефоне і 455 – у онлайн-фармаце.