«Я адзіная жанчына ў бізнэсе ў рамонце аўтамабіляў»

Беларуска расказала, як з бухгалтаркі стала ўладальніцай аўтамайстэрні.

Рамонт аўтамабіляў большасць кіроўцаў уважаюць за мужчынскую справу. Але не кліенты аўтамайстэрні «Малер Майстар» у Дубеях, дзе прымае аўтамабілі ў рамонт, ацэньвае аб'ём працы і дае прафесійныя парады жанчына - майстар-прыёмшчык Вольга Швайкоўская. І не многія ведаюць, што яна дырэктарка-заснавальніца гэтай аўтамайстэрні. Як кажа бізнэсвумэн, яна адзіная жанчына ў бізнэсе ў рамонце аўтамабіляў.

Вольга Швайкоўская расказала жаночаму праекту Lampa пра сябе, пра тое, як прыйшла ў аўтабізнэс.

«Не ведала, дзе крыло, а дзе бампер»

«Мне 32 гады, нарадзілася ў Салігорску, – расказвае Вольга. - Пасля школы скончыла Салігорскі эканамічны каледж, адразу паступіла на завочнае аддзяленне ў Беларускі аграрны ўніверсітэт. Уладкавалася на працу бухгалтаркай да індывідуальнага прадпрымальніка, які займаўся гандлем прадуктамі харчавання. Але нешта мне не падабалася, хацелася больш актыўнай працы. Такую працу знайшла на станцыі тэхнічнага абслугоўвання аўтамабіляў, куды таксама ўладкавалася бухгалтаркай. Хаця ў той час не ведала, дзе крыло, а дзе бампер.

Праца на СТА змяніла мае прыярытэты. З'явілася цікавасць да тэхнікі, з якой жыву ўжо 12 гадоў. За гэты час вывучыла прыладу аўтамабіляў амаль усіх мадэляў.

Ад ідэі да рэалізацыі

Паўтара гады таму ў мяне з'явілася жаданне адкрыць уласную аўтамайстэрню. Нялёгка гэта далося. Тры месяцы давялося прыводзіць у парадак пустуючае памяшканне, закупляць неабходнае абсталяванне і інструмент.

Але я гэта зрабіла, мара здзейснілася. Цяпер я дырэктарка-заснавальніца аўтамайстэрні «Малер Майстар». Праца цікавая, сумаваць некалі.

Цяпер у майстэрні працуюць тры цэхі па рамонце кузаваў, ёсць свая фарбавальная станцыя. У штат уваходзяць восем аўтаслесараў высокай кваліфікацыі.

Год працы. Вынікі

За год працы мы сур'ёзна рушылі наперад у бок якасці. Кожны аўтамабіль падчас рамонту абследуецца незалежным экспэртам. Такой паслугі няма на большасці такіх прадпрыемстваў у горадзе.

Прэтэнзій ад заказчыкаў аўтамайстэрня не мае. Гэтаму спрыяе як майстэрства аўтамайстроў, так і выкарыстанне пры рамонце толькі прэміяльных матэрыялаў з Нямеччыны, Італіі і Японіі.

У вядзенні бізнэсу дапамагае адукацыя. Я паспяхова скончыла ўніверсітэт, таму ў пытаннях эканомікі нядрэнна разбіраюся.

Што засмучае

Станцыі тэхнічнага абслугоўвання горада, вядома ж, канкуруюць паміж сабой, а хацелася б супрацоўніцтва ў гэты няпросты для бізнэсу час. Але я бачу, як цураюцца мяне мужчыны, нават спрабавалі пагражаць.

Я адзіная жанчына ў бізнэсе ў рамонце аўтамабіляў, але выдужала, майстэрня працуе паспяхова.

Калегі пра начальніцу

Меркаваннем аб сваім дырэктару падзяліўся Ілля Аляксандравіч, аўтамаляр майстэрні «Малер Майстар»:

«Працую тут з дня адкрыцця. Рамонтны персанал тут сабраўся высокай кваліфікацыі. Вельмі важна, што мы забяспечаныя найноўшымі прыборамі, інструментам і абсталяваннем. А яшчэ тут дзіўная ўвага да работнікаў. Ёсць душавыя, пакой для прыёму ежы, лядоўня. Наша Вольга клапоціцца пра нас, рамонтнікаў».