Барэль заклікаў краіны ЕЗ падвоіць вайсковую дапамогу Украіне
- 13.09.2022, 21:08
- 4,700
Ён заявіў, што ўкраінцы дасягнулі значна большых поспехаў, чым чакалі ў ЕЗ.
Краіны Еўразвязу безумоўна ахвочыя і надалей даваць вайсковую падтрымку Украіне, аднак на іх даводзіцца чыніць націск, каб неабходную дапамогу Кіеву давалі хутка, сказаў вярхоўны прадстаўнік у замежных справах і палітыцы бяспекі Еўрапейскай Уніі Жазэп Барэль. У аўторак, 13 верасня, у Страсбургу ён адказаў на пытанні дэпутатаў Еўрапарламента аб вайне ва Украіне і дапамозе Еўразвязу ўкраінцам, піша DW.
«Цяпер вельмі важна скарыстацца сітуацыяй паспяховай контратакі украінцаў. Яны дасягнулі значна большых поспехаў, чым нават мы самі чакалі, а значыць, стратэгія, якую мы выбралі з самага пачатку - дакладная. Цяпер нам трэба падвоіць намаганні, а не вагацца, - упэўнены Барэль. - Пуцін грунтуецца на тым, што слабыя і далікатныя дэмакратыі ўзімку перастануць падтрымліваць Украіну дзеля, холаду, высокіх цэн. Трэба працягваць дапамогу Украіне, бо мы бачым, што яна эфэктыўная».
Ён звярнуўся да грамадзян краін Еўразвязу з заклікам не аслабляць гэтую падтрымку. Зала адрэагавала воплескамі.
«Хто б мог падумаць, калі Пуцін пачаў вайну, што праз шэсць месяцаў расейскае войска будзе абараняцца і адыходзіць? Гэта магчыма ў першую чаргу дзякуючы бясстрашнасці і адданасці ўкраінцаў сваёй краіне, а ў другую - нашай дапамозе», - падкрэсліў Барэль.
ЕЗ палепшыць каардынацыю паставак узбраенняў Украіне
Каб паскорыць вайсковую падтрымку Украіне, краіны ЕЗ маюць лепш каардынаваць паміж сабой намаганні для кампенсацыі адна адной абяцаных Украіне ўзбраенняў у рамках колавых паставак. Затрымкі з пастаўкамі ўзбраенняў Украіне адбываюцца збольшага праз тое, што ўрады краін ЕЗ не могуць дамовіцца паміж сабой, сцвярджае вярхоўны прадстаўнік ЕЗ у палітыцы бяспекі. Паводле ягоных слоў, цяпер увойдзе ў дзеянне новы механізм, які дазволіць фарсаваць гэтыя працэсы.
Упершыню ў гісторыі ЕЗ мабілізаваў свае ўласныя рэсурсы, каб даць дапамогу ваеннай краіне, указаў Барэль. І ўпершыню бюджэт для гэтай дапамогі быў дадзены з міжурадавага фонду ЕЗ. "Мы будзем і далей нястомна падтрымліваць Украіну" і дапамагаць ёй дасягнуць яе мэт, да якіх належыць не толькі поўнае вызваленне яе тэрыторыі, але і працяг барацьбы датуль, пакуль Расея цалкам не возьме на сябе адказнасць за разбурэнне Украіны, падкрэсліў галоўны дыпламат ЕЗ.
Санкцыі перашкаджаюць Расеі аднаўляць матэрыяльныя страты
У адказ на пытанне аб санкцыях у дачыненні да Расеі ён заклікаў не здымаць іх, пакуль яны не дасягнуць поўнага эфекту. «Санкцыі ўжо працуюць супраць Расеі ў гэтай вайне. Паглядзіце на вантробы падбітага расейскага танка на ўкраінскай вуліцы, і вы ўбачыце, колькі тамака заходніх марак электронікі. 45% расейскага рынку тэхналогій залежаць ад Еўропы, мы паклалі канец гэтым пастаўкам, - растлумачыў кіраўнік дыпламатыі ЕЗ. - Дзве траціны расейскіх самалётаў больш не лятаюць, бо яны зробленыя на Захадзе, а эмбарга ЕЗ не дазваляе ім атрымліваць запасныя часткі. Гэта ўплывае на магчымасць Расеі аднавіць свае гіганцкія матэрыяльныя страты ў вайне».
Акрамя таго, паводле ягоных слоў, нафтагазавыя даходы РФ за першыя 8 месяцаў 2022 года знізіліся на 18% у параўнанні з аналагічным перыядам 2021 года, бо краіны Еўразвязу сталі купляць у Расеі ў пяць разоў менш энэрганосьбітаў, чым да вайны. Аб'ёмы паставак з РФ у ЕЗ знізіліся настолькі, што нават рост цаны газу больш не кампенсуе страт, сцвярджае Барэль. "І мы далей зніжаем спажыванне расейскага газу і прыкладаем усе намаганні для поўнай энэргетычнай незалежнасці ад гэтай краіны", — дадаў ён.
У 2022 годзе ЕЗ выдаткаваў дадаткова 9 мільярдаў еўраў у якасці макраэканамічнай дапамогі Украіне, з іх краіна атрымала пакуль толькі 1 мільярд. Паралельна Кіеў вядзе перамовы з Міжнародным валютным фондам для атрымання новай, значна большай макраэканамічнай дапамогі, паведаміў Барэль.