Святар Багамольнікаў пасля 14 адседжаных дзён на волю не выйшаў
1- 15.09.2022, 21:40
- 6,324
Ён быў затрыманы 31 жніўня.
У праваслаўнага святара Уладзіслава Багамольнікава 14 верасня мінуў чатырнаццацідзённы тэрмін адміністрацыйнага арышту, які яму далі пасля брутальнага затрымання ГУБАЗіК 31 жніўня. Але яго не выпусцілі, даўшы новыя 15 дзён, паведамляе тэлеграм-канал «Хрысціянская візія».
Уладзіслаў Багамольнікаў - клірык Менскай епархіі Беларускай Праваслаўнай Царквы, выкладчык Менскай духоўнай акадэміі. Ён восенню 2020 года адпраўляў на Плошчы Перамен паніхіду па забітым Раману Бандарэнку, абвяшчаў галадоўку на знак салідарнасці з палітвязнем Ігарам Лосікам.
Рэжымныя тэлеграм-каналы раней паведамлялі, што святара, які дапамагаў украінскім уцекачам, пераследуюць нібыта за збор сродкаў для УСУ. Супраць Багамольнікава прапаганда разгарнула ў інтэрнэце цэлую кампанію цкавання і пагроз.