Турцыя спыніла навучанне расейскіх пілотаў

Праз санкцыі.

Расейскія пілоты больш не змогуць практыкавацца на трэнажорах імітацыі палёту (FTSD) у турэцкім навучальным цэнтры Turkish Airlines. На рассылку адпаведных паведамленняў звярнуў увагу тэлеграм-канал «Авіятаршчына».

Турэцкая старана спаслалася на ўзмацненне санкцый Еўрапейскага агенцтва бяспекі палётаў (EASA). Расейскія кампаніі не змогуць працаваць з FSTD, бо ўсе гэтыя трэнажоры ўхваленыя EASA.

Са слоў авіяцыйных экспертаў, якіх апытаў The Insider, менавіта ў Турцыі расейскія пілоты праходзілі навучанне пасля закрыцця Еўропы. У самой Расеі ёсць трэнажоры толькі для самых распаўсюджаных тыпаў магістральных самалётаў сямейства Airbus A320 і Boeing B737. А для такіх мадэляў, як Boeing B777 або Airbus A350, трэнажораў у Расеі няма.

Пры гэтым падрыхтоўка на трэнажоры з'яўляецца абавязковай часткай падрыхтоўкі і падтрыманні кваліфікацыі пілотаў: нават пры рэгулярнай практыцы яны павінны праходзіць выпрабаванні на трэнажорах.

Без навучання на неабходным абсталяванні лятаць бяспечна не выйдзе, канстатуе суразмоўца выдання. Пілот без абавязковай практыкі на трэнажоры страціць кваліфікацыю, і яго не дапусцяць да палётаў у адпаведнасці з авіяцыйнымі правіламі РФ.

Даўней авіякампаніі самі пачалі звальняць пілотаў, "куляючы" іх падчас праверак на авіятрэнажоры. Як заявілі ў Шарамецьеўскім прафесійным звязе лётнага складу, такім чынам кампаніі спрабуюць скараціць лётны склад: дзеля вайны ва Украіне і санкцый супраць расейскіх авіякампаній у іх узнік «відавочны лішак кадраў».