УСУ адбілі ў акупантаў важны лагістычны вузел
1- 28.09.2022, 15:42
- 6,468
Вызваляць яго давялося з дапамогай цяжкіх баёў.
Украінскія Сілы абароны адбілі ў акупантаў Купянск-Вузлавы ў Харкаўскай вобласці. Гэты важны для расейцаў лагістычны вузел цяпер - пад «амаль поўным» кантролем Украіны.
За пасёлак Купянск-Вузлавы захопнікі з адчаем трымаліся, вызваляць яго давялося з дапамогай цяжкіх баёў. Як піша obozrevatel.com, пра гэта ў эфіры нацыянальнага тэлемарафона паведаміў кіраўнік Харкаўскай абласной ваенна-грамадзянскай адміністрацыі Алег Сінягубаў.
«У расейцаў было некалькі важных кірункаў - гэта Ізюм, так званая «ізюмская вышыня». Умоўна кажучы, шлях, па якім вораг накіроўваў сваю вайсковую тэхніку на тэрыторыі Луганскай і Данецкай абласцей, дзе яны ўзмацнялі сваю прысутнасць. І, вядома, Купянск-Вузлавы - гэта адна з самых вялікіх чыгуначных лагістычных развязак на тэрыторыі Харкаўскай вобласці, якая з пачатку поўнамаштабнай вайны была акупаваная, і яе вораг досыць моцна абараняў і трымаў. Дзякуючы паспяховай ваеннай аперацыі УСУ яе сапраўды цяпер адбілі і фактычна цалкам кантралююць», - заявіў Сінягубаў.
На тэрыторыі пасёлка Купянск-Вузлавы знаходзіцца аднайменная чыгуначная станцыя - гэта вялікі чыгуначны вузел, які забяспечвае злучэнні па чыгунцы са станцыямі Харкаў, Валуйкі, Святагорск, Белгарад, Папасная, Купянск-Паўднёвы.
Гэты чыгуначны вузел захопнікі актыўна выкарыстоўвалі для перакідкі з Белгарадскай вобласці на ўсход Украіны тэхнікі, узбраення і жывой сілы РФ. Цяпер жа папярэдняя лагістыка разбураная, а значыць, ва УСУ з'явілася больш магчымасцяў для працягу контрнаступлення ў Луганскай вобласці.
Сінягубаў таксама адзначыў, што дагэтуль пад расейскай акупацыяй заставалася блізу 6% тэрыторыі Харкаўскай вобласці. Аднак пасля апошніх поспехаў Узброеных сіл іх стала «крыху менш».
Як паведамлялася раней, ва ўкраінскіх воінаў ёсць поспехі і ў Данецкай вобласці. На днях стала вядома, што УСУ вызвалілі ад акупантаў Яцкаўку і аднавілі кантроль над пазіцыямі каля Бахмута.