Навукоўцы: Выпадковы шум павялічвае здольнасці мозгу

Штучна створаны шум дапамагае хутчэй вучыцца і лепш засвойваць інфармацыю.

Згодна з новым даследаваннем, штучна створаны выпадковы шум можа дапамагчы мозгу лепш вучыцца. Мяркуецца, што выпадковы шум дапамагае навучанню, павялічваючы пластычнасць мозгу або здольнасць успрымаць новую інфармацыю - фактычна, дапамагаючы мозгу фармаваць новыя шляхі ды сувязі.

Навукоўцы апісалі новую тэхніку пад назвай "Транскраніяльная стымуляцыя выпадковым шумам (tRNS)". tRNS мае на ўвазе размяшчэнне электродаў на скуры галавы чалавека і прапусканне слабых электрычных токаў праз пэўныя часткі мозгу.

Са слоў нэўролага Ана ван дэр Гроена з Універсітэта Эдыт Коўэн у Аўстраліі, гэта можа паскорыць навучанне і дапамагчы людзям з нэўралагічнымі захворваннямі. Людзі з цяжкасцямі ў навучанні змогуць выкарыстоўваць tRNS, напрыклад, для павышэння хуткасці навучання.

Дадаванне стымуляцыі мозгу падчас навукі можа палепшыць навучанне, а таксама дапамагае з канцэнтрацыяй увагі пасля лячэння. tRNS можа мець два эфекты:

"востры" эфект, пры якім навучанне паляпшаецца пры ўжыванні tRNS;

доўгатэрміновы, які мадулюе эфект, пры якім кагнітыўныя функцыі могуць быць палепшаны ў будучыні нават пасля спынення выкарыстання tRNS.

Даследаванні паказалі, што tRNS дапамагае:

палепшыць глядзельнае ўспрыманне;

больш эфектыўна засвойваць новую інфармацыю;

палепшыць здольнасць факусавацца.

Таксама гэта карысна ў абсягах, дзе мозг можа быць пашкоджаны або аднаўляецца пасля пашкоджання.

Аднак, tRNS не можа бясконца падвышаць узровень мозгу. У пэўных сцэнарах і ў пэўных векавых групах ужыванне электрычнага шуму ніяк не ўплывае на мозг. Напрыклад, навукоўцы правялі эксперымент, у якім спрабавалі палепшыць матэматычныя навыкі супэрматэматыка. tRNS не моцна паўплываў на яго прадукцыйнасць, бо ён ужо з'яўляецца найлепшым у гэтай галіне.

Яшчэ адна перавага tRNS у тым, што для дзейнасці не патрабуецца складаная лабараторная ўстаноўка. Даследчыкі кажуць, што ў будучыні можна будзе распрацаваць наборы, якія людзі змогуць выкарыстоўваць самі без пабочнай дапамогі. Навукоўцы працуюць над даследаваннем, адпраўляючы абсталяванне людзям, а яны самі ўсё ўжываюць дыстанцыйна.

Са слоў экспертаў, канцэпцыя tRNS адносна простая. Гэта як батарэйка: ток ідзе ад плюса да мінуса, але праходзіць і праз галаву.