ВВС: Расея стала закладніцай Кітая і Індыі

Нафтавае эмбарга нанесла вялізныя страты бюджэту краіны-агрэсаркі.

Расея ўжо больш за месяц жыве ва ўмовах эмбарга і граніцы коштаў, усталяваных Захадам у дачыненні да расейскай нафты. Абмежаванні прывялі да рэзкага зніжэння кошту расейскай сыравіны і паставілі Маскву ў залежнасць ад Кітая і Індыя – найбуйнейшых імпарцёраў расейскага паліва, піша BBC.

З 5 снежня набыло моц эмбарга на пастаўкі танкерамі расейскай сырой нафты на рынак Еўразвязу. Адначасова з гэтым Захад увёў ліміт коштаў на «чорнае золата» з РФ на ўзроўні 60 даляраў за барэль і забараніў перавозку і страхаванне расейскай нафты, калі яе кошт перавышае ўсталяваны парог.

Абмежаванні прывялі да росту коштаў на страхаванне грузаў з расейскай нафтай і паслугі брокераў. Акрамя таго, выраслі выдаткі на дастаўку расейскай сыравіны, бо зараз асноўным рынкам збыту для яе стала Азія.

Гэтыя выдаткі не ўключаны ва ўмовы продажу і аплачваюцца пакупніцкай краінай, а значыць Расея змушаная рабіць зніжкі, каб не страчваць астатніх пакупнікоў.

Такім чынам, з дапамогай зніжак кампенсуюцца выдаткі на доўгі шлях да канчатковага спажыўца. Санкцыі пазбавілі Расею магчымасцяў фармаваць больш высокія кошты і ўсталёўваць свае правілы на рынку.

Наадварот, гэта буйныя пакупнікі расейскай нафты, напрыклад, такія як Кітай і Індыя, могуць дыктаваць свае ўмовы, а РФ будзе вымушаная на іх згаджацца, заявіў інвестыцыйны стратэг КК «Арыкапітал» Сяргей Сувераў.

У такіх рэаліях расейскі бюджэт, які перажывае і без таго далёка не найлепшыя часы, рызыкуе недаатрымаць яшчэ некалькі трыльёнаў рублёў.

Тым часам здабыча нафты ў Расеі можа ўпасці на 500-700 тысяч барэляў за дзень на пачатку гэтага года. Такія лічбы пасля ўвядзення санкцый называлі ва ўрадзе РФ.