У Расеі прапанавалі канфіскоўваць маёмасць тых, хто з'ехаў за мяжу

Падгледзелі закон у лукашыстаў?

У Расеі прапанавалі канфіскоўваць маёмасць тых, хто з'ехаў за мяжу. З такой прапановай выступіў спікер Дзярждумы РФ Вячаслаў Валодзін.

Адыёзны расейскі палітык сказаў, што некаторыя расейцы "ўважаюць за магчымае абражаць Расею, яе жыхароў, салдат і афіцэраў, адкрыта падтрымліваць зладзеяў, нацыстаў і забойцаў". Мэта такіх людзей, на думку Валодзіна, - "выслужыцца і паспрабаваць захаваць свой дабрабыт за мяжой".

“Такія заявы могуць быць расцэнены як заклікі да экстрэмізму, рэабілітацыя нацызму ці дыскрэдытацыя Узброеных сіл. Устанавіць склад злачынства - гэта задача следства. Як паказала практыка, існых мер рэагавання недастаткова”, - піша Валодзін.

"У гэтай сітуацыі правільна будзе адпаведныя артыкулы Крымінальнага кодэкса дапоўніць пунктам аб канфіскацыі ў нягоднікаў маёмасці ў РФ, якой у іх дастаткова, каб кампенсаваць прычыненую шкоду", – сказаў Валодзін.

Як пісаў сайт Charter97.org, у Беларусі таемна прыняты закон, які робіць магчымым канфіскацыю маёмасці ў беларусаў. Магчыма, Валодзін падгледзеў ідэю канфіскацыі маёмасці ў сваіх калег з Беларусі.