Марыю Калеснікаву перавялі з медсанчасткі ў атрад Гомельскай калоніі

Палітзняволеную ўжо накіравалі на працу.

Як стала вядома 16 студзеня, палітзняволеную Марыю Калеснікаву вярнулі на месца адбывання пакарання і накіравалі на працу, бо палічылі, што яна ўжо дастаткова рэабілітавалася пасля хірургічнай аперацыі. Пра гэта паведамляе тэлеграм-канал Віктара Бабарыкі.

«Вестка аб стане Марыі Калеснікавай пасля аперацыі: перавялі ў атрад з медчасткі, выйшла на працу, але стамляецца пасля змены, пачынае набіраць пакрыху вагу, адчувае сябе нармальна», - напісана ў паведамленні.

Крызіс са здароўем у палітзняволенай пачаўся 28 лістапада, калі «да праблем з ціскам, млоснасцю і стратай прытомнасці дадаўся пакутлівы боль у страўніку». Калеснікаву тэрмінова шпіталізавалі ў Гомелі з прабадзеннем язвы і зрабілі аперацыю. Пазней яе перавялі ў медсанчастку калоніі, дзе дазволілі пабачыцца з бацькам.

Незадоўга да шпіталізацыі Марыя Калеснікава адбывала 10 дзён у штрафным ізалятары, дзе было вельмі холадна, праз што палітзняволеная амаль не спала. Некалькі разоў яна губляла прытомнасць, мела падвышаны ціск і млоснасць. Сярод іншага яна страціла прытомнасць у душы і пры падзенні параніла ногі.