5 лютага 2023, Нядзеля, 21:21
Сім сім, Хартыя 97!
Рубрыкі

СМІ: Клайпедскі тэрмінал цяпер можа прымаць пастановы без удзелу «Беларуськалія»

4
СМІ: Клайпедскі тэрмінал цяпер можа прымаць пастановы без удзелу «Беларуськалія»

Акцыянер клайпедскага тэрмінала змяніў статут.

Ігар Удавіцкі, найбуйнейшы акцыянер клайпедскага Тэрмінала насыпных грузаў (Biriu kroviniu terminalas - BKT), так і не выкупіў 30% акцый кампаніі, якія належаць «Беларуськалію». Замест гэтага на пазачарговым сходзе акцыянераў быў зменены статут BKT, што дае магчымасць прымаць пастановы без прадстаўнікоў беларускага боку. Пра гэта паведаміла літоўскае інфармацыйнае агенцтва BNS.

Раней без удзелу прадстаўнікоў «Беларуськалія» важныя пастановы прыняць было немагчыма, бо паводле статуту трэба было заручыцца трыма чвэрцямі галасоў акцыянераў. На пазачарговым зборы BKT Ігар Удавіцкі, які валодае 70% акцый, прапанаваў змяніць гэты пункт. Цяпер важныя пастановы можна прымаць дзвюма трацінамі галасоў. У пратаколе сходу было пазначана, што памяняць статут давялося, бо дзель «Беларуськалія» ў кампаніі BKT замарожаная праз санкцыі, адпаведна прадстаўнікі беларускага боку не могуць скарыстацца правам голасу.

Служба ў расследаванні фінансавых злачынстваў Літвы не знайшла ніякіх прававых ці іншых перашкод і дазволіла рэгістрацыю новай рэдакцыі статута BKT. У самой кампаніі ад каментароў з гэтай нагоды ўстрымаліся.

Нагадаем, Беларусь праз санкцыі пазбавілася магчымасці экспартаваць свае ўгнаенні праз парты краін Балтыі. З 1 лютага 2022 года Літва перастала прымаць беларускія цягнікі з калійнымі ўгнаеннямі, якія рухаліся ў Клайпеду.

У апошнія гады праз Клайпедскі порт на судны грузілася блізу 10-11 млн тон угнаенняў «Беларуськалія» за год.

У сакавіку BKT паведаміў, што плануе звольніць амаль усіх працаўнікоў праз прастой тэрмінала ва ўмовах адсутнасці грузаў.

«Беларуськалій» набыў 30% клайпедскага тэрмінала ў 2013 годзе. Сума ўгоды склала 30 млн даляраў.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».