У Запарожскай вобласці заўважылі вайскоўцаў з шаўронамі «віцебскага падраздзялення»

Мэр Мелітопаля заявіў, што гэта беларускія жаўнеры.

Мэр акупаванага Мелітопаля Іван Фёдараў сцвярджае, што ў Запарожскую вобласць Украіны перакінулі беларускіх вайскоўцаў.

Аб гэтым піша «РІА Мелітопаль».

«Чарговая хваля расейскіх жаўнераў заехала і ўчора і сёння заязджаюць беларускія жаўнеры. Яны могуць лічыцца ў нейкай прыватнай вайсковай кампаніі, напрыклад, «Вагнера». Мы не ведаем, як яны будуць прыкрываць свой удзел у гэтай вайне супраць Украіны. Магчыма, яны скажуць, што гэта не рэгулярныя войскі Беларусі. Але па факце гэта беларусы», - заявіў ён.

Іван Фёдараў адзначыў, што ў іх былі шаўроны «віцебскага падраздзялення».

Варта адзначыць, у Расеі таксама існуе 38-я асобная гвардзейская мотастралковая Віцебская брыгада. На яе шаўронах ёсць надпіс «Віцебская».