У Расеі перасталі афармляць 10-гадовыя замежныя пашпарты

Чыноўнікі спасылаюцца на «адсутнасць чыпаў».

У Расеі спынілі афармленне біяметрычных замежных пашпартоў з тэрмінам дзеяння 10 гадоў. Расейскія чыноўнікі сцвярджаюць, што гэта часовая з'ява, піша «Медуза».

Інфармацыю аб прыпыненні афармлення 10-гадовых замежных пашпартоў журналістам пацвердзілі ў шэрагу рэгіянальных управаў МУС Расеі.

«У сувязі з інфармацыяй ад АТ «Гознак» выраб пашпарта, які змяшчае электронны носьбіт інфармацыі, з тэхнічных прычын папярэдне адкладзены да сярэдзіны сакавіка 2023 года», – заявілі ў паліцыі Цвярской вобласці.

Чыноўнікі запэўніваюць, што расейцы па-ранейшаму могуць аформіць замежны пашпарт старога ўзору тэрмінам на пяць гадоў.

Як піша ТАСС, жыхар Масквы паведаміў ім аб атрыманай адмове пры спробе аформіць 10-гадовы замежны пашпарт у цэнтры дзяржпаслуг «Мае дакументы». Там спаслаліся на «адсутнасць чыпаў» для пашпарта.